Varios politico di Aruba di bishita serca minister Plenipotenciario di Aruba

DEN HAAG – Minister plenipotenciario di Aruba na Hulanda Alfonso Boekhoudt tabata ocupa cu bishitanan di Aruba e siman aki. E prome pa bishit’e tabata minister di labor y asuntonan social di Aruba Paul Croes, y tambe lider di fraccion di partido MEP Evelyn Wever Croes.

Minister Paul Croes a bisa cu e meta di su bishita na Hulanda ta pa hiba combersacionnan ariba diferente topico, pero principalmente ariba e topico cu merece atencion debido cu ta derechonan di mucha, y guia di nos hobennan. Hunto cu tur partner na Aruba pero tambe den Reino mester uni forza pa atende cu e desafionan cu tin ariba e tereno aki. Tambe a discuti e trabounan cu ta wordo haci pa realisa desaroya un pilar economico nobo pa Aruba. ‘Cas di Aruba lo bai hunga un rol importante den esaki y sigur pa yega na interesa nos hobennan pa despues di nan estudio nan por regresa Aruba.

Pa loke ta e bishita di e lider di fraccion di MEP, a papia ariba diferente topiconan di interes general pa Aruba, pero toch cu atencion special pa nos Arubianonan cu ta biba na Hulanda. Principalmente e grupo di studiantenan cu tin na Hulanda merece atencion pa cu nan preparacion prome cu nan bin Hulanda, pero tambe pa e tempo cu nan ta biba, studia y kisas traha pa algun aña na Hulanda. Riba e combinacion di potret por mira e minister plenipotenciario cu su respectivo bishitantenan di Aruba.