Douaneronan malcontento pa incumplimento di convenio salarial

ORANJESTAD – Douaneronan a protesta awe mainta pa incumplimento di gobierno di un convenio firma aña pasa. Segun presidente di e sindicato SADA Eduard Maduro, a reuni den ora di trabou awe mainta pa atende e asunto. Ta trata di un convenion firma aña pasa cu gobierno anterior riba un structura salarial nobo cu ta drenta na vigor 1 di januari 2018. Algo cu aparentemente no a pasa. A haci un peticion pa reunion cu e mandatario, pero no a haya un contesta formalmente. Como tal a dicidi awe mainta pa entrega un carta na e mandatario encarga, pa haya informacion riba e asunto.

DISGUSTO

Despues cu e douaneronan a reuni na nan oficina, a dicidi di bay pa Fort Zoutman y di eynan marcha bay Bestuurskantoor y entrega carta di e mandatario en cuestion. Na yegada na Bestuurskantoor, a haya tende cu e mandatario por ricibi un persona so. Ta pendiente e resultado di e intercambio entre e presidente di sindicato SADA y e mandatario envolvi.