Croes: E brug ta bon construi por use den tur trankilidad

ORANJESTAD – E brug di Green Corridor ta bon construi y e ta safe. Asina director di Dienst Openbare Werken Marlon Croes a sigura den un conferencia di prensa diaranson merdia. Segun Croes, pa cuminsa, e compania cu a construye cu ta Odinsa ‘a duna di conoce cu e brug ta bon construi’. Un auditor certifica independiente a controla esaki a bira esaki durante e proceso di e trahamento te final. “Den nos wowo y den nos analise, nos no ta wak ningun preocupacion. Pueblo por usa e brug cu tur trankilidad” Croes a sigura tur hende. E hecho cu un rapport di PriceWaterhouseCoopers (PWC) ta bisa cu tin duda den e calidad, ta algo diferente segun Croes.

PWC

Manera ta conoci, PWC a traha un memo riba e brug, y a ilustra nan preocupacion y alavez a indica 500 punto di preocupacion. Algo cu Croes no a nenga. Pero segun Croes, tin cu splica con tin cu mira e rapport(memo) di PWC. E compania den e caso aki, a actua como e consehero di DOW como consehero y experto riba maneho di contracto. Algo cu na Aruba no tin experticio ariba. Basa riba peticion di e minister encarga, den e caso aki Otmar Oduber cu ta minister di infrastructura, PWC a duna un presentacion. E prome parti tabata uno unda cu a indica cu tin cosnan cu a bay malo, for di cuminsamento. “E proceso interno di e compania no ta ariba nivel pa e trabou wordo haci” Croes a confirma di loke PWC a bisa. Segun Croes, esey ta un otro calidad di proceso, contra e calidad di e producto pafo. E calidad di proceso ta unda cu nan ta wak e metodo di verificacion cu ta e calidad di proceso, cu ta algo separa di e calidad di e producto.

SMAC

E rumor cu tabata circula cu e fundacion cu ta maneha e temporada di carnaval esta SMAC, no a haya ningun carta di DOW riba e responsabilidad di e brug. “Cu ami sa, no a bay ningun carta pa SMAC” Croes a sigura e portal aki. E rumor tabata cu DOW lo a manda un carta pa e fundacion, indicando cu nan no ta para responsabel pa trucknan pisa cu ta wordo usa den carnaval, si nan pasa riba e brug. Esaki debi cu e brug lo tabata ‘unsafe’. Croes a desmenti esaki. Pa loke ta e informacion cu minister lo a bisa cu e no ta para resposabel pa e brug, Croes a bisa cu e minister a pidi e contratista un carta cu e ta responsabel pa e brug. “Segun e contract, e contratista ta responsabel pa e brug caba. Minister kier un confort letter cu ta bisa cu si, como contratista mi ta responsabel pe” Croes a bisa. Esey ta bay sosode den e dianan cu ta bin.

500 mankement

Pa loke ta e lista di 500 fayo (mankement) cu lo tin, Croes a coregi esaki tambe, bisando cu ta 500 observacion haci. Esey por ta simplemente cosnan cu a wak, pero no necesariamente cu ta cosnan cu ta fout. “Bo tin observacionnan cu ta ‘prosesmatig’ y bo tin observacionnan cu ta constructief”, Croes a bisa. Pero esaki no kier men cu tin 500 cos cu ta malo den e proyecto. Basa riba e lista, ta bay sinta y wak kico mester drecha y kico no, pa yega na un fecha nobo cu por termina e proyecto completamente.