Trabou Watty Vos Blvd na rotonde ex Codemsa para ainda

ORANJESTAD – E trabaonan riba Watty Vos Boulevard ta para ainda, particularmente altura di e rotonde na ex Codemsa y e caminda entre e rotonde di FCCA y esun di ex Codemsa. Y cu cada yobida di awa manera awe mainta, e area ta bira un piscina ‘natural’, strobando fluho di trafico. Minister di infrastructura Otmar Oduber recientemente ainda a confirma cu e trabou ta para, pendiente un discusion entre DOW y e compania responsabel MOtaEngil. Y e mandatario ta confirma tambe cu e problema ta e fluho di awa cu no ta sirbi. Un comunicado di DOW sinembargo a informa cu lo ta asfaltando e caminda dilanti Royal Funeral Home, aunke no ta conoci si esaki ta parti di e ‘reparacion’.

AWA

Tabata den un entrevista recien cu NoticiaCla, cu Oduber a confirma e mal trabou haci pa e compania MotaEngil, bou di guia di DOW. Dado momento ora cu di yobida, e area completo tabata bou di awa, strobando fluho di trafico. A nota cu a haci un fayo cu e construccion, cu a pone cu mester a manda busca expertonan di Hulanda pa yuda soluciona e problema. Esey e propio director di DOW Marlon Croes a confirma pa e portal aki algun tempo atras. No a tende nada mas despues riba e tema, te cu awe cu tin un comunicado riba ‘ponemento di asfalt dilanti Royal Funeral Home’.

ODUBER

Pa loke ta e comentario di Oduber, e mandatario a confirma algun dia atras pa e portal aki cu e trabou ta para, debi na mal calidad. “E trabou cu a wordo haci simplemente no ta bon. E no ta guiando, procesando e awa, pa cual bo ta wak cu e trabou a wordo completamente para”, Oduber a sigui bisa. E ta un di e puntona cu DOW y MotaEngil tin cu bay discuti ariba proximamente segun e mandatario.