Evertsz: Suficiente banda por compaña ‘Luwi’ Jano cu su tumba ganador

ORANJESTAD/WILLEMSTAD – ‘Un ta cuestion cu el a keda sin banda’ ta contesta di e roadmanager di e banda Buleria di Aruba, Esta Jairo Evertsz a sigura NoticiaCla dialuna atardi. E pregunta aki a surgi henter weekend, tanto na Aruba como Corsou, ora cu e resultado a bira conoci cu un cantante di Corsou a gana e tumba di Corsou, pero usando un banda di Aruba. A surgi mesora e discusion cu si awor Buleria tin cu keda Corsou como obligacion pa compaña Urvin ‘Luwi’ Jano e periodo di carnaval cu a resta.

SOLUCION

Segun Evertsz, esaki no ta e caso ya cu asosacion di musica di Corsou a reparti e areglo pa tur banda di Corsou caba. Y tur banda por compaña Jano. Ademas tin un pista tambe traha caba pa ora cu tin actividad chikito. Contrario na Aruba, ta un obligacion di bandanan di Corsou pa toca e tumba ganador, pues esey no ta problema. E bon ta si, cu pa e Marcha di despedida, cu pa nos ta equivalente na Kimamento di Momo, Buleria mes ta tocando na Corsou, pues ta claro cu pa e marcha ey, Jano lo ta cu Buleria. E resultado diabierna a percura pa duna Buleria por lo menos 2 nomber den e prome 5 nan, cu Jano como prome, sigui pa Rocco Franken cu a logra #4. Pa e finalistanan pa diabierna, Aruba tabatin por lo menos 3 finalista (di 4 cu a participa).