Croes : Ta bay para practica ilegal laboral den refineria

ORANJESTAD – Gobierno ta bay para practica ilegal laboral den refineria. Asina e mandatario di labor Glenbert Croes a declara dialuna mainta den un conferencia di prensa. Segun e mandatario a aproba leynan pa duna ‘inspeccion di labor’ poder pa por actua contra tur esaki. A target specificamente dialuna e parti di refineria, basa riba informacion di ‘paden’ cu tin practica illegal tumando lugar. E mandatario a admiti cu tabatin critica cu gobierno no ta actuando riba e tema, y ta compronde e critica si y cu kier trece solucion. Un di e pasonan pues cu Croes a tuma, ta pa gobierno aproba proposicion pa tin e autoridad pa haci e trabou. Leynan cu cambia na 2013, a duna cu tin un base legal pa wordo defini, pero e autoridad nunca a wordo aproba. Sinembargo siman pasa conseho di minister a aproba esaki a tuma lugar y a wordo aproba.

INDICACION

Segun e mandatario, tin indicacion di practica cu contratistanan di afo y local ta laga hende drenta supuestamente como turista, y ta info cu ta ricibi di paden. E mandatario sinembargo a confirma na NoticiaCla cu no a tuma contacto cu e autoridadnan na Refineria mes riba e tema, sino cu a basa su mes riba ‘informacion for di paden di e refineria’. Esey no ta kita afo cu e mandatario a papia cu mando di e refineria cu a bisa cu ‘e unico forma pa para esaki ta pa aplica e leynan necesario’.

COMPROMISONAN

Entre nan, cuanto ora ta laga trahadonan traha, con ta controla esaki, con ta controla overtime, con ta paga esaki, si ta paga minimum loon etc. “Mi a instrui, basa riba critica, arbeidsinspectie pa controla tur sector, y cuminsa e sector di e refineria. “Tin hopi hende ta drenta Aruba como turista, y ta bay traha despues (p.e. na refineria)”. Lo bin un cooperacion entre ministerio di labor y husticia, pa bringa tur e fenomenonan aki. Illegalidad cu a wordo tolera 8 aña, ta bay wordo para, segun e mandatario. “Tin hopi contratista cu ta na tempo pa coregi e actonan (illegal), cu ta wordo tolera”.