Serlimar: Vacatura ta pa yena posicion desocupa, no pa kita personal

ORANJESTAD - Contrario na locual a ser publica na algun radio emisora y den corant Solo di Pueblo, Serlimar oficialmente pa medio di un comunicado a declara cu e publicacion di vacatura en cuestion (un aviso a sali tambe riba NoticiaCla dialuna ultimo), manera den tur compania, tin unicamente como meta pa yena un cupo di trabao desocupa cu tin na Serlimar. Esaki ta di suma importancia pa e compania estatal por opera y cumpli cu su servicionan. No ta correcto ni husto pa cambia e contexto di esaki mirando cu ta e compania y tur su empleadonan ta wordo perhudica na momento cu trece insinuacionnan erroneo den prensa.

Serlimar pa e motibo aki a desmenti categoricamente e argumentonan treci dilanti den cierto medionan di comunicacion cu lo a forza un empleado di retira di su puesto. Serlimar ta traha segun reglas y no tin espacio ni tempo pa practicanan di intimidacion, manera algun media ta insinua.

Hecho ta cu Serlimar a publica un vacatura pa un puesto unda cu tur candidato cualifica ta bon bini pa aplica pa e funcion aki pa sigui engrandece e compania y su servicionan tanto publico como comercial. Lo encamina e proceso di seleccion. Finalmente, e mihor candidato pa e compania lo wordo escogi, segun e comunicado.