Coneccion aereo entre Aruba y Corsou problematico ultimo dianan

WILLEMSTAD – Coneccion aereo entre Aruba y Corsou e dianan aki ta problematico. Hopi pasahero disgusta a comunica cu NoticiaCla riba e problema pa yega nan destinacion, y mayoria ta pa motibo di problema cu e aerolinea InselAir International. Sigur mirando cu e fin di siman aki tin e final di Tumba na Corsou y e final di Calypso na Aruba. Hopi pasahero a keda pega na Aruba y ainda diabierna mainta tabata purbando pa haya un cupo toch pa Corsou. Otronan na Corsou, ta duda si nan ta yega Aruba na tempo pa e festival di Calypso. E portal Curacao Chronicle ta raporta problema tecnico na InselAir international, cu tin e aerolinea tranca. Intento pa haya contacto cu e aerolinea no tabata exitoso ainda. For di Aruba Airlines a compronde cu nan no ta raportando nada particular. For di aeropuerto a compronde cu tur buelo di Insel Air entre Aruba y Corsou tin retraso awe diabierna.

PASAHERONAN PEGA

Diahuebs varios pasahero a tuma contacto cu e portal aki, splicando nan frustracion pa cu e situacion. Nan mester a biaha for di diaranson cu Insel Air, pero no a logra yega Corsou ainda diahuebs anochi. “E buelo di 11am a bira 7’or y despues a cancela esaki tambe. Pa diabierna mainta a cancela buelonan tambe. Pues nos ta pega, sin sa si nos ta yega Corsou na tempo” un pasahero a bisa. Na Corsou tin musiconan di Aruba cu tin cu wak con nan ta logra yega Aruba diasabra ainda pa participa den e final di e Calypso. Na tur, tin hopi pasahero disgusta cu nan no ta logrando pa sea yega Corsou y/of Aruba.

PROBLEMA

E portal di Corsou Curacao Chronicle ta raporta cu e aerolinea ta ‘plega’ pa asuntonan operacional, un scarcedad di avion y falta di ‘spare parts’ pa mantene nan 3 avionnan operacional y den aire. Segun e portal di Corsou, varios buelo a keda ehecuta pa e aerolinea haitiano Sunrise Airways. Segun rumornan no confirma, hasta e ultimo avion operacional Fokker 50 lo ta na tera desde ayera. A compronde tambe cu e aerolinea lo no tin suficiente placa pa cumpra ‘spare parts’ pa mantene e avionnan bulando.