C3 a celebra apertura di su oficina nobo na Emmastad

WILLEMSTAD- Recientemente staff i personal di C3 a celebra apertura di nan oficina nobo na Emmastad. E edificio a keda completamente renoba, moderniza i awor ta mas espacioso tambe. Awor C3 tin su propio tayer na unda cu instalacion di aparatonan por tuma luga, tambe a crea henter un hala tecnico for di cual por duna servicio na clientenan di C3. Sr. Bert Schreuders, director di C3 a gradici e publico grandi pa nan presencia durante un anochi asina importante. Hunto cu accionista, Curaçao Growth Fund (Justus Martens i Erik Baas) a amplia riba e vision pa futuro i e proyectonan riba cual C3 lo enfoca durante di e proximo periodo.

C3 ta ofrece su servicionan na Corsou, Aruba, Sint Maarten, islanan BES i Anguilla- i tin nan propio red TETRA riba tur e islanan. Como experto den comunicacion critico nan ta ofrece solucionnan pa diferente organisacion i empresanan cu ta activo den sector di seguridad. Ademas di esaki, C3 su oficinanan recien establece na Colombia i Panamá- pronto Republica Dominicana ta enfoca riba distribucion di productonan di comunicacion i seguridad pa henter region. E proyectonan cu ta wordu hasi for di e oficinanan internacional ta contribui na e mision di C3, pa bira lider den region riba tereno di ‘Critical Communication’.