A cuminsa otorga rijbewijs temporal blanco diaranson

ORANJESTAD – Manera anticipa pa NoticiaCla.com siman pasa, gobierno a resolve e problema di rijbewijs den un forma temporal. Diaranson tabata asina lew cu e prome persona a ricibi su carnet temporal for di man di minsiter di husticia, Arthur Dowers. E persona cu a ricibi esaki a caba pasa su examen. Mes momento e mandatario di husticia a sigura cu a ‘haal in’ e retraso di servicio di rijbewijs.

“Tin dos aspecto cu nos mester tene cuenta cune. Tin un gran cantidad di rijbewijs cu ta cla y cu ta na Hulanda cla pa wordo manda Aruba. Y na momento cu esaki ta finalisa lo avisa e comunidad pa asina busca nan rijbewijs”, e mandatario a splica. Di otro banda ta asina cu e proceso di rijbewijs cu ta wordo haci na Hulanda ta tuma su tempo y ta pa e motibo aki mes lo bay stop cu e servicio aki. Lo inicia cu e tramitenan pa haci e servicio aki na Aruba mes”, Dowers a sigui splica.

Pesey pa awor y pa e periodo nos dilanti, Aruba lo conta cu e rijbewijs blanco. E prome ehemplar pues ya caba a ser otorga awe . Esun temporal ta un rijbewijs di color blanco cu ta indica cu e ta limita na un temporada. Na momento cu e rijbewijs original keda cla, mester entrega esun temporal. Esun cu no haci esaki, lo por haya un proces-verbaal.

Un otro aspecto importante den e rijbewijs temporal aki ta e aspectonan di siguridad. E no ta facil pa duplica, falsifica of cambia. E tin “features” di siguridad cu ta wordo detecta inmediatamente. Mester ta hopi cauteloso ya cu e por trece hopi hende den problema.

Mes momento e proceso di busca esaki, a keda splica. Tambe na momento cu e rijbewijs original yega, e ciudadano ta wordo informa y asina e por entrega e rijbewijs temporal cu lo wordo destrui debidamente. Asina ta facilita e ciudadano pa su papel importante pa asina e por conduci cu siguridad y cautela.