Coney Island a haya luz berde pa habri atrobe!

ORANJESTAD - Interpark Coney Island a haya luz berde di polis pa continua cu su operacion atrobe. Asina e productor di e parke Steve Hudson a confirma pa NoticiaCla diamars atardi. Esey ta nifica cu e suspencion di 48 ora ta vence.  "Nos a haya ok di polis. Nos ta on", Hudson a bisa e portal aki. Algun rato prome e productor tabata live riba pagina di Facebook di NoticiaCla, unda el a contesta inquietudnan rond di e parke y e ceramento pa 48 ora. Entre e dudanan, ta si e parke su ekiponan ta sigur, si ta trata di material bieuw etc. Ademas e mandatario di husticia a pidi Hudson pa un carta di garantia cu nan ta responsabel pa tur operacion. E la duna e ora un polisa di seguro cu ta mustra cu tur bishitante ta sigura pa maximo 250.000 florin si algo pase na e parke. Ademas a sigura cu tur e ekiponan ta wordo controla tur dia y tin documentacion pa esey. E parke ta keda na Aruba te april proximo.

ACCIDENTE

Tabata diasabra anochi cu un mucha a accidenta riba un di e aparatonan, cu a causa cu minister a suspende e operacion pa 48 ora pendiente un investigacion. A resulta cu no ta e aparato a faya, sino ta e mucha no a acua conforme e regla di e aparato, cu a resulta den su accidente. E mucha mientrastanto ta ok di salud, y e departamento tecnico di gobierno a controla tur aparato y a duna luz berde cu tur cos ta ok.