Mama di Zinnia Croes ta splica con polisnan a actua den caso di su yiu

ORANJESTAD – Segun Michella Croes-Matos, -e mama di e damita cu a fayece tragicamente 3 aña pasa esta Zinnia Croes dfm-, tin mas caso (tragico) cu a sosode unda cu polis ta tapa pa otro ora cu un di nan mes ta envolvi. “Mi si ta kere cu corupcion ta wordo haci den esaki, e mama a sigui bisa, refiriendo na e caso di nan unico yiu muher. Zinnia e anochi tragico na maart 2015, a keda alcanza pa un dama polis cu lo tabata bou di influencia di alcohol.

REACCION DI E MAYORNAN

E mayornan, esta Michella y e tata Gilbert, ta contento cu e decision di hof pa persigui e polis envolvi den morto di nan yiu, aunke nan ta conciente cu esey lo no trece nan yiu bek. Segun e mama Michella, hopi hende no a kere cu nan lo por a yega asina leu, te pa haya un ‘victoria’ diabierna atardi.

Manera elabora caba, diasabra e mayornan y nan abogado Sven Faarup a topa prensa pa elabora riba e decision di Hof, manera cu NoticiaCla a publica den forma di primicia, un dia prome. Hof a dicidi diabierna cu Ministerio publico mester persigui e polis, y ministerio publico mesun atardi a confirma pa NoticiaCla cu nan lo cumpli cu e decision di Hof, despues cu aña pasa nan mes a dicidi pa no persigui e polis.

CORUPTO

Pa loke ta polis corupto, e mama Michella mes momento a sigura cu no ta tur polis ta corupto. “Tin polis cu ta stima nan trabou di berdad” Croes a bisa. Sinembargo e ta considera cu den nan caso lamentablemente esaki no tabata e caso. “Mi tin cu bisa cu unabez cu nos caba cu esaki, nos ta bay sigui cu e personanan cu a traha e dia ey y cu a comete tur e blunder ey den caso di Zinnia”. E no ta haya cu ta husto cu nan como famia tin cu bringa pa nan yiu cu nan a perde, y ainda tin cu bringa un caso.

STIMA

E mama como sugerencia y conseho pa tur otro famia, a bisa pa bisa nan yiunan tur dia cuanto nan ta stima nan, cual ta haci hopi cu e yiu homber, ruman di Zinnia. A recorda cu a lanta un fundacion pa concientiza e asunto di maneha bou di influencia, esta drinking and driving. A mustra cu no kier men cu bo no mag bebe, pero ora cu bo hacie haciele responsabel. A splica cu e fundacion ta bayendo hopi bon, y ta mustra cu 2017 a cera cu solamente 2 morto di trafico. Berdad 2 ta di mas pa e famianan. “Pero nos ta kere cu nos ta haciendo algo bon pa comunidad. Locual mi kier bisa, cu di algo hopi malo, algo bon a sali”.