Bikker: Mas preocupacion na Coney Island cu djis e accidente di mucha

ORANJESTAD – Tin mas preocupacion cu a bin dilanti relaciona cu e Coney Island, fuera di e caso di e mucha cu a ‘accidenta’ diasabra, segun minister di husticia Andin Bikker. E mandatario ta referi na e.o. preocupacion pa cu acceso na cierto atraccion, unda cu no ta controla riba edad, y e hecho cu riba e otro islanan, e Coney Island aki no a wordo aproba. Cuerpo policial y DTI a keda di haci un analisis riba e preocupacion, y lo bin un rapport riba cual lo dicidi e siguiente paso, y si ta kita e suspension di e operacion. Pa loke ta e operadornan di e Coney Island, nan a informa NoticiaCla dialuna cu un ora pa otro lo tene un conferencia di prensa di nan banda pa splica nan banda. Te ainda, sinembargo esaki no a tuma lugar. 

SUSPENSION

Manera ta conoci, diadomingo minister Bikker a anuncia cu ta suspende e operacion di e Coney Island pa 48 ora pa bin cu un control y investigacion riba e caso di accidente di e mucha diasabra anochi. Dialuna mainta e mandatario a sigui elabora riba e tema aki y kico tin cu haci prome cu kita e suspension. “Den 48 ora cu a cuminsa core desde ayera, ta spera awe diligentemente Korps Politie y DTI haci e sondeonan necesario pa por tuma decision pa loke ta e operacion” Bikker a bisa. El a ricibi basta critica riba e tema, pero a bisa mesora cu na final di dia e interes di gobierno ta interes di pueblo pa loke ta seguridad di nos pueblo y hubentud cu ta atende e Coney Island.