Awe corte ta trata caso sumario ex hunta directiva Lotto contra gobierno

ORANJESTAD – Awe mainta e ex miembronan di hunta di comisario di Lotto ta trata e caso cu nan a entama contra gobierno. Esaki pa bringa e retiro otorga na nan, door di e gobierno actual. Mientrastanto minister encarga cu Lotto, esta minister deporte Dangui Oduber a confirma pa NoticiaCla dialuna mainta cu enberdad no a warda e resultado di e caso, pero cu a nombra miembronan nobo di directiva caba. No mas cu e miembronan nobo no ta activo ainda. Ta trata di Marc Figaroa di AAA NV, Ross Franken di APFA, Ruben Ricky Kock di CMB, Elgin Zeppenfeld di bufete di abogado WIx and Zeppenfeldt, y Rubinah Bernadina MDC. E caso ta tuma lugar 11’or.

GASTO

Segun Oduber, ta haya increibel con hopi e hunta aki tabata costa pais Aruba. “Nan ta e unico hunta di comisario ( di tur hunta di fundacion y nv di gobierno) cu ta costa 600 mil florin pa aña. “Mi no sa si nan ta cobre na salario of otro beneficio” Oduber a bisa. A menciona mesora cu e hunta di comisario cu ta paga miho, ta esun di AZV unda cu cada miembro (nan ta 5), ta haya 2500 florin pa luna. Esey ta nifica cu pa aña e ta costa gobierno 150.000 florin, compara cu 600 mil cu esun di Lotto ta gana, segun Oduber. NoticiaCla a busca reaccion di e miembronan di e ex hunta di comisario, pero nan no a reacciona riba peticion di e portal aki.