Dialuna awo gobierno ta anuncia decision final riba futuro carnaval Aruba

ORANJESTAD – Dialuna otro siman gobierno ta anuncia ken y con ta sigui cu carnaval 61 na Aruba. E mandatario encarga cu Cultura, Otmar Oduber a confirma e noticia di NoticiaCla.com cu e comision encarga pa bin cu conseho riba carnaval, a entrega e rapport final diaranson atardi laat. Gobierno lo repasa e consehonan di e comision, y lo presenta e decision pues otro siman.

NoticiaCla.com a compronde via su fuentenan yega na e comision, cu un di e consehonan ta cu pa por garantisa continuacion di e carnaval e aña aki ainda pa otro aña, cu mester inclui gran parti di e plan y organisacion di SAC. Di otro forma e comision no ta mira e situacion factibel y realistico pa ranca sali ‘na tempo’ e aña aki ainda y ta cla pa presenta un programa pa 11 di november proximo.

E mandatario no por a duna contesta riba e pregunta aki, mirando cu e no a mira e rapport completo aki. Mes momento Oduber a mustra cu e consehonan di e comision, ta keda netamente esey, esta un conseho. “Naturalmente unabes cu nos considera y evalua tur e puntonan cu ta wordo treci dilanti, y dependiendo kico ta e puntonan cu ta wordo treci dilanti, y mirando e constelacion di e comision, mi ta convenci cu ta trata di un conseho cu practicamente por wordo tuma literalmente over” Oduber a bisa. Si esey ta un hecho, ainda tin cu wak, pasobra e minister no a mira e consehonan ainda na momento cu e la comenta na NoticiaCla.com.

E trabou di e comision ta un culminacion di simannan di incertidumbre, despues cu un intento pa resolve un problema di hopi tempo entre gruponan di carnaval y SAC, no a logra nada fructifero. Enbes di yega na otro, cos a empeora mas ainda, cu a pone cu gobierno a tuma e decision pa instala e comision menciona, y duna nan e tarea pa sondea un caminda nobo y presenta despues di nan investigacion, un plan di maneho pa por lanta un proximo plataforma carnavalesco cu tin cu bay guia e proximo periodonan di Carnaval na Aruba.