Varios lugar di watersport a haya prome advertencia y a ‘shut down algun

ORANJESTAD - Mayoria localidad a haya nan prome advertencia y algun lugar a wordo ‘shut down’. Gino Winklaar cu ta lidera e Task Force Beach Policy a informa cu e accionnan di e Task Force Beach Policy a cuminsa, manera cu a priminti. Den siman diferente Ministernan y departamento concerni a reuni pa trata e maneho di Beach Policy y pa percura pa esforza e maneho di ‘3 strikes you’re out’. Minister Otmar Oduber como e Minister encarga cu DIP y tur locual cu ta encera permiso di operadornan riba nos Beach ta splica cu e controlnan aki lo keda tuma lugar den un forma structura pa asina garantiza cu nos pilar economico ta wordo proteha y nos beachnan respeta.

E controlnan a inicia for di trempan despues cu e Task Force a reuni 9or di mainta. E control a inicia na Beach Druif panoord di Tamarijn y sigui bay pabou. For di e 42 Watersports cu a controla, 40 di nan a haya nan prome advertencia y 2 di nan tabata cera (doñonan no tabata presente). 3 di nan mester a wordo cera inmediatamente pasobra nan no tabatin permiso pa opera. Tur esnan cu a haya strike mester pasa na DIP durante di e siman aki pa controla nan papelnan. Tambe DIP lo bay procesa esakinan cu nan departamento huridico.

Segun Winklaar, e Task Force a haya un bon comienzo, e cooperacion di e diferente instancianan bou di un pechi ta dunando su frutonan pa locual cu ta encera e diferente tareanan di e departamentonan cu ta cruza den otro. Como cu aworaki e diferente departamentonan ta hunto, por traha na un forma mas eficiente. E advertencianan cu a wordo duna tabata pa diferente incumplimento y ta encera incumplimento cu condicionnan stipula den e permiso. Winklaar ta remarca cu tin hopi falta di comprendemento di locual cu mag y no mag, di parti di e operadornan cu tin basta tempo ta opera cu mal custumber. Sinembargo a para ariba cu e strike ta conta, y e maneho di 3 strikes ta keda vigente. Den cada advertencia cu a duna e operador tin tambe un fecha como ‘deadline’ pa asina e cumpli of regla e incumplimento.

Intencion di e Task Force Beach Policy ta pa percura pa tin control riba locual cu ta tuma lugar riba nos beachnan y trece e sentimento di siguridad bek den e area. E accionnan aki lo keda tuma lugar pa garantiza cumplimento di e Beach Policy. Den e proximo simannan nos dilanti pueblo por spera cu lo tin mas control ta tuma lugar den diferente area riba nos beachnan.