OM: Lo sigui cu persecusion di agente policial den caso di Zinnia Croes

ORANJESTAD – “Ta mas cu claro cu nos ta respeta decision di huez”. Asina vocero di ministerio publico Ann Angela a reacciona pa NoticiaCla riba e decision di hof di diabierna, cu ta bisa cu OM mester persigui e polis envolvi den e caso tragico di 2015 di morto di e hobencita Zinnia Croes. “Y nos lo haci tur lo posibel pa sigui cu (e) persecusion”, Angela a sigui bisa. Mas cu claro. Nos ta vanzelfsprekend respeta decision di huez y nos lo haci tur lo posible pa sigui cu persecucion.

KEHO

Angela a mustra cu contrario na pensamento, esaki no tabata un apelacion sino mas bien un keho. “Ora hende no ta de acuerdo cu un decision tuma pa ministerio publico, e tin derecho pa entrega un keho contra e decision aki. Esaki ta segun articulo 15 di Wetboek van Strafvordering.”Angela a sigui splica. Y ta e decision ey di Corte Superior a cay na fabor di famia di Zinnia Croes. Segun Angela, apelacion ta ora ta contra decision di huez.

E DECISION

Manera NoticiaCla a raporta anteriormente awe, Hof a dicidi cu ministerio publico mester persigui e polis envolvi den e accidente cu a causa morto di e hobencita Zinnia Croes algun aña pasa. Abogado pa e famia, Sven Faarup a confirma esaki diabierna atardi laat. Segun Faarup, ta un proceso cu nan a cuminsa algun tempo pasa, y awe hof mester a dicta. Y e abogado a confirma cu e sentencia tabata na fabor di e famia. Mientrastanto diasabra mainta e famia lo duna un conferencia di prensa riba e tema aki.

E CASO

Tabata aña pasa december ora cu e hueznan di Hof a scucha e polis envolvi den e accidente tragico na 2015 cu a causa morto di Zinnia Croes. Riba insistencia di e famia, na September a apela e decision di OM pa no persigui e polis. E apelacion a yuda y a pone cu hueznan na december a scucha e polis. A base di e proceso ey, awe huez a dicta na fabor di e famia.