Quota Club Aruba a lansa campaña di earplugs pa carnaval

ORANJESTAD – Quota Club Aruba a lansa su campaña di earplugs pa e temporada di carnaval 64. E slogan e aña aki ta “ Den Carnaval 64 cuida bo oido cada rato, pa bo no perdé, den un rato”. Pa e ultimo 29 añanan Quota ta lansa e campaña pa haci uso di earplugs durante e temporada di Carnaval. A ripara aña pa aña cu e demanda pa earplugs ta bira mas grandi. Tanto pa carnavalistanan y e hendenan para na banda di caminda ta pidi earplugs y Esey ta duna nos e animo pa sigui cu e campaña aki.

Quota a mustra cu nan ta hopi contento di anuncia cu pa di 10 aña consecutivo WEB Aruba ta contribuyendo cu Quota, cu donacion di earplugs. E aña aki un biaha mas Quota ta conta cu All Safety wear cu ta sponsor earplugs cu cabuya y sin cabuya. Quota a gradici tur gruponan di carnival cu ta contribui cumprando earplugs delanta pa nan participantenan. Esaki ta un muestra grandi cu nos miembronan di carnaval ta consciente e importancia di oido, cual Quota ta aprecia masha tanto.