Simar lo entrega minister, firmanan pa asunto di airco

ORANJESTAD – E comision di sindicato di maestro SIMAR, esta e comision ‘pro airco y sala di educacion fisico pa tur scol’, lo haci entrega di e firmanan colecta durante e ultimo lunanan di 2017 na minister di enseñansa Dr. Armando Rudy Lampe. Asina e sindicato a informa diabierna. Na luna di november Minster Lampe a haya un splicacion amplio di e accion y e motivacion su tras. Segun e sindicato, su persona a vocifera di ta contento di mira docentenan lanta para pa nan derecho y pa bienestar di tanto docente como studiante y ta cla pa ricibi e coleccion di firma menciona. E coleccion, cosistiendo di docente di tur tipo di ensen?ansa, ta representa un 65% di docentenan di Aruba. Hopi ta esnan cu ta duna sosten verbal, pero cultura di miedo, politica y asta abuso di poder a priva algun di duna sosten cu nan firma.

HORCAN

E sindicato ta recorda cu aki tres luna nos lo ta drenta e temporada di horcan, caminda calor lo azota nos atrobe. “ Nos tur tabata testigo di e ola di calor na 2017, cu a causa malestar y asta, pa prome biaha den historia di nos pais, scol mester a caba trempan pa alumnonan. E accion pasivo aki ta pa bienestar di tanto alumno como docente. Airco no ta luho, ni necesidad. Airco ta un derecho, cual porcierto ta mara na ley di seguridad di e empleado, cual den e caso aki ta pa seguridad di su alumnonan tambe”. Di aki tambe e lema “Calor un echo, airco nos derecho” a nace.

Pa medio di e comunicado aki e comision a haci un yamada na tur docente cu ta pro e accion aki, pa sostene e comision na momento di e entrega di e coleccion di firma y e carta cu ta inclui e metanan, e ley y e puntonan di atencion pa cu e necesidad di airco y sala di educacion fisico pa tur scol di Aruba. E entrega lo tuma lugar otro siman diaranson 24 di januari na bestuurskantoor. A pidi docentenan pa reuni ‘riba Plenchi Shon A. Eman, net pariba di Parlamento pa 2:30 di atardi, pa hunto bay haci e entrega na Minister Lampe. “Laga nos mustra cu nos ta uni den esaki y cu e accion aki ta unu serio door di bisti cora y sostene e comision. “Uni nos ta logra. Separa, lubida!”” e comision di sindicato a laga sa. NOTA: e potret ta di archivo di noticiacla di aña pasa october ora cu nan a alerta comunidad caba durante un conferencia di prensa ,riba e tema.