Reunion entre Venezuela y islanan ABC pa awe cancela

ORANJESTAD/CARACAS – “E reunion no ta tuma lugar mas awe diahuebs”. Esey tabata mensahe di prome minister di Aruba Evelyn Wever Croes diahuebs marduga na NoticiaCla riba e cancelacion di e reunion planea cu Venezuela awe. Mientras cu a confirma e cancelacion, no a duna e motibo di e cancelacion. E reunion planea pa awe, mester a trece un fin na e impasse entre Venezuela y e islanan ABC y habri e frontera di nobo pa e trafico comercial por a continua normal bek.

INDEFINI

For di ayera tabata circula noticia tambe cu e blokeo/boycot di Venezuela pa cu islanan ABC a keda ‘prolonga te proximo aviso’. Sinembargo fuentenan cerca di gobierno Venezuela a sigura e portal aki cu esey no ta exactamente corecto, den sentido cu esey tabata e status for di ultimo biaha cu a prolonga e medida cu 3 dia mas. E status ey tabata poni caba riba e NOTAM (notificacion aereo), esta cu a prolonga e prohibicion pa ‘tempo indefini’. Pues de hecho esey no tabata nada nobo y no a bin como un ‘medida’ nobo.

CONFERENCIA

Awe mainta prome minister Wever tin planea pa duna un conferencia di prensa riba e tema, unda cu e lo tin cu duna un actualisacion di e situacion y posiblemente nos por tende e motibo di e cancelacion di e reunion poni pa awe. Un dia prome, tabatin informacion caba cu tabatin duda cu e reunion lo a tuma lugar awe, y mas aun, cu e lo no tuma lugar na Aruba sino na Caracas. Cierto medionan a raporta cu e reunion ta cancela pasobra ta ‘investigando’ e concepto di e acuerdo y cu tanten cu presidente Venezolano Nicolas Maduro no firma e acuerdo, ningun reunion no ta sigui entre Venezuela y islanan ABC.