Jeon a mustra chispa di videoclip 'Machika' na publico

ORANJESTAD – E conocido cantante local Jonathan Thiel, conoci awendia como ‘Jeon’, dilanti un publico grandi riba tereno di ex John F Kennedy School a presenta un chispa di e video clip di su cantica Machika. E version internacional ta keda lansa diabierna awor pa e artista internacional José Álvaro Osorio Balvin, miho conoci como J Balvin. Un amistad spontaneo cu a nace na New York entre Jeon y J Balvin, a desaroya den un amistad profesional, cu a conduci na integracion di Jeon den e grupo di J Balvin. Reglanan internacional a pone cu Jeon por a presenta solamente parti di e video clip, dunando espacio pa e lansamento oficial diabierna awor na Los Angeles. Potretnan di NoticiaCla ta duna un impresion di e ambiente diaranson anochi. Despues di diabierna, Jeon ta uni cu J Balvin pa un gira internacional den cual Jeon por presenta como parti di e opening act, fuera di forma parti di e cancion Machika, (y e video clip).