Wever ta contradeci informacion di Venezuela cu Hulanda a tranca acuerdo

ORANJESTAD – Contrario na informacion for di Venezuela, cu Hulanda a tranca e acuerdo cu Venezuela diabierna ultimo, prome minister di Aruba Evelyn Wever a desmenti esaki publicamente. Segun e mandatario, Enfaticamente el a bisa cu no por papia di trancamento di Hulanda y a elabora mas riba con e reunion mes a bay bisando “Ningun momento por menciona cu e negociacionnan a wordo tranca pero esakinan ta partinan inherente na negociacionnan ora cu no tin tur hende sinta na mesa cu por tuma decision”.

PREGUNTA

Tabata un pregunta cu Prome Minister a haya di e portal aki despues cu el a duna su relato riba e reunion di diabierna ultimo, pa haya su reaccion cu si tabata berdad cu Hulanda a tranca e negociacionnan andando, manera Venezuela ta sigura. E ponencia alaves a bira un rumor den medionan social. Enfaticamente e mandatario a bisa cu no por papia di trancamento di Hulanda. “Den e prome mitar di e reunion tabata tin deliberacionnan den e sala di reunion. Despues di e deliberacionnan cada delegacion a separa nan mes pa bay contact nan respectivo gobiernonan cu excepcion di Aruba pasobra ami tabata presente y tabata facil pa tur informacion yega na mi. Despues cu e nan a notifica nan gobierno, e delegacionnan a bin bek hunto pa sigui delibera e puntonan cu tabata riba mesa. Manera ta custumber den reunionnan asina, tin hopi discusion y tardanza. E seriedad di e tema a haci cu tur tema wordo trata debidamente. Pero ningun momento por menciona cu e negociacionnan a wordo tranca pero esakinan ta partinan inherente na negociacionnan ora cu no tin tur hende sinta na mesa cu por tuma decision”.