Kvk: Situacion entre Venezuela y Aruba afectando comercio

ORANJESTAD – Mientras cu Camara di Comercio (KvK) kier laga e situacion actual entre Aruba y Venezuela den man di e politiconan pa aworaki, e presidente Ernst Mohamed a duna un reaccion chikito si na NoticiaCla e siman aki. “E ta afectando nos comercio, nos pueblo tambe” Mohamed a admiti. “Mi ta hayando hopi yamada di comerciantenan” e presidente a sigui bisa. El a mustra mes momento si cu nos no mester keda enfoca riba dos solo pilar, manera Aruba a haci pa e ultimo 30 añanan. “Un pilar ta wishi washi, y e otro ta yegando su saturation stage caba. Nos tin cu cuminsa diversifica” Mohamed a sigui bisa.

PRODUCTO

A mustra cu mester cuminsa diversifica tambe di unda nos ta haya nos productonan. “Semper nos mester tin un plan A, B, C and D pa bo no keda depende di un solo supplier” Mohamed a bisa. “Nos ta wak aworaki cu tin un par di hende na Aruba cu ta sufriendo. Y esey ta nos mensahe pa gobierno aki, cu ta cu nos ta duna nan espacio pa negosha tur cos den buena fe. Pero e tin cu bay di tur dos banda”, e president a finaliza bisando.