Misier: Cambia ROP pa beneficia e comerciante local mas

ORANJESTAD – Mester cambia e Ruimtelijke Ontwikkelings Plan (ROP) den un ROPV (met voorschriften) segun vice presidente di Parlamento Kawish Misier. Argumento di Misier ta cu e forma con e ROP ta hinca den otro, ta stroba hopi comerciante (local) di haci negoshi. Entre nan tambe ta frustrante. Segun Misier, si comerciantenan local kier traha boutique hotels, nan no no por hacie na e area di high rise segun e ROP, sino den tereno di naturaleza unda cu posiblemente a resta lugar. Pero ROP no ta permiti nan. Ora di diseña e ROP segun Misier, a djis marca un liña di noord pa zuid, unda cu tur cos bou di e liña por a traha kico cu ta, free for all, mientras tur area riba e liña no por traha nada. “No ta bon pa hopi hende, incluyendo hendenan cu tin tereno priva pasobra nan a perde nan inversion” Misier a bisa, refiriendo na hendenan cu a inverti den tereno pero a bin compronde despues cu pa motibo di e ROP, no por haci nada comercial cu e tereno. “Tin tereno priva pero e ROP mester wordo adapta den un ROPV. E tin cu bira un ley y no manera e ta awor, djis un maneho di gobierno” Misier a sigui bisa. E vice presidente ta mustra cu e ROP ta e back bone di nos pais y ta structura e maneho unda nos kier bay.