Compania renombra di accountant ta perde caso contra ex director Lotto

ORANJESTAD – E compania di accountant renombra Ernst & Young (EY) a actual illegal contra ex director di Lotto Endy Croes y acusacionan den e rapport traha contra Croes, no tin base. Asina corte di apelacion a dicta den un sentencia diamars mainta. Abogado di Croes, Anthony Ruiz a splica NoticiaCla cu e ta considera e dia di awe como uno grandi pa su cliente. Sigur si tene na cuenta tur e añanan cu e cliente mester a pasa door acusacionnan sin base. Corte di apelacion a mustra cu e compania a acto illegal, incorecto y cu e acusacionnan contra Croes den e rapport traha, no ta corecto. E sentencia ta uno largo di 23 pagina, unda cu hueznan a tuma nan tempo pa motiva nan argumentacion. E contra partido tin 3 luna pa bay casacion, y Croes ta prepara awor pa cuminsa caso penal contra e compania y tambe uno di daño y perhuicio.

CASO

Segun Ruiz, na 2012 caba 3 huez a absolve Croes di a haci malo penalmente, y awor na 2018 atrobe 3 huez den caso civil ta absolve Croes di acusacionnan segun un rapport traha pa e compania EY. Segun Ruiz, e hueznan a mustra cu e contenido di e rapport ta yena cu contenido basa riba mentira, konkelmento, scondemento di informacion, cu e unico intencion pa caba cu e reputacion di su cliente Endy Croes. Ruiz a mustra tambe cu EY a haci asina hopi fout cu no por conclui otro cu a haci tur esaki deliberadamente. For di 2010 e problemanan pa su cliente a cuminsa, ora cu e cliente tabata na cabez di Lotto. Dado momento te hasta e cliente a bay cera pa algun dia, riba orden di ministerio publico. Na 2011 a entama un caso caba penal, pero cu no a haya oido. Awor lo haci mescos y cu e rapport desbarata y un sentencia asina grandi, Ruiz no ta kere cu lo pasa otro cu nan lo gana esey tambe. Y den e caso di daño di perhuicio, no ta cuestion di si ta bay hacie, sino cuanto placa ta bay pidi pa e compania grandi aki paga. Mientras cu esey por zona positivo pa su cliente, Ruiz ta sigur cu e amargura cu e cliente a pasa aden tur e tempo, no ta hustifica ningun suma di placa. Lesa e sentencia AKI.