Cantidad di placa den circulacion a baha na Aruba

ORANJESTAD - Banco Central di Aruba (BCA) ta conclui den su relato mensual di Juli 2014 cu e cantidad di placa den circulacion a baha cu Afl. 21,6 miyon te na Afl. 3.400,5 miyon, causa pa un bahada di Afl. 47,5 miyon den e activo domestico netto, cual a wordo compensa parcialmente cu un subida di Afl. 25,9 miyon den e reserva di divisa netto (excluyendo diferencianan den revaluacion di oro y reservanan internacional). E bahada den e componente domestico di e cantidad di placa den circulacion a surgi for di un reduccion di Afl. 67,7 miyon den credito domestico, mientras cu e transaccionnan no relata na credito a subi cu Afl. 20,2 miyon.

E aumento den transaccionnan no relata na credito a resulta for di transaccionnan di clearing. E bahada den credito domestico a resulta for di credito bancario mas abow na tanto e sector publico como na e sector di priva, respectivamente, Afl. 48,9 miyon y Afl. 18,8 miyon. E reduccion den e debe netto di e sector publico na e sector bancario a wordo causa principalmente pa un subida di Afl. 56,7 miyon den e depositonan di gobierno relata na e bononan di gobierno emiti na balor di Afl. 69.2 million. Credito bancario na e sector priva a baha door di reduccionnan den credito na empresa y credito na consumidor di, respectivamente, Afl. 15,6 miyon (-1,2 porciento) y Afl. 5,6 miyon (-0,9 porciento). Hipoteca pa vivienda, di otro banda, a crece cu Afl. 2,4 miyon (+0,2 porciento). E subida di Afl. 25,9 miyon den e reserva di divisa netto ta debi primordialmente na entrada di Afl. 37.6 miyon relaciona cu compra di bononan di gobierno door di no residente como parti di e total di bononan di gobierno emiti menciona anteriormente. E entrada aki a wordo parcialmente mitiga pa un deficit di Afl. 17.0 miyon riba e cuenta coriente, causa pa deficit riba e cuentanan di mercancia, e asina jama income account y current transfer account y un surplus riba e cuenta di servicio, relaciona cu entradanan for di turismo.

E indice di prijs di consumo (CPI) di Juli 2014 a registra un subida di 0,7 porciento compara cu e mesun luna di 2013. E contribuyente principal na e aumento aki ta e componente “Transporte” y “Cuminda y bebida no alcoholico”. Excluyendo e componentenan di cuminda y energia (cual parcialmente ta afecta e componentenan vivienda y transporte), inflacion a subi cu 0,1 porciento compara cu Juli 2013. Pa loke ta trata e promedio anual di e tasa di inflacion, esaki tabata 0,5 porciento na Juli 2014.