Ex minister Sevinger na minister Oduber: ‘I don’t give a damn’!

ORANJESTAD – Durante su disertacion awe mainta den e reunion publico pa trata e proyecto di Green Corridor y Watty Vos Boulevard, ex minister responsabel pa e proyecto esta Benny Sevinger a declara cu e ta orguyoso di e trabou cu su team e tempo ey a haci pa e proyecto y cu e forma con a anda cu e proyecto tabata corecto. Ademas a cuestiona e forma con actual minister encarga cu e proyecto, Otmar Oduber kier resolve e problema, cu ta busca mas placa pa caba esaki. Pero loke mas a hala atencion, tabata e declaracion final di e ex minister, unda cu el a bisa cu kico cu e minister actual kier haci, ‘Be my guest.. pasobra I don’t give a damn! ”. Un declaracion cu rapidamente a bira e palabra di dia, tanto den Parlamento como riba rednan social. 

INFORMACION

E reunion tabata pidi pa gobierno, pa informa parlamento di e situacion cu tin aworaki cu e dos proyectonan, Green Corridor y Watty Vos Boulevard. Aparentemente cosnan no ta bayendo bon y cu mester di ayudo. Sevinger a mustra cu e forma con e mandatario actual kier anda cu e proyecto, no ta corecto ya cu e contractonan mes ta stipula pasonan cu tin cu tuma si algo ta robez of a bay malo. “Tin cu sinta na mesa y delibera e caso” Sevinger a bisa. A sigui algun orador di gobierno, cu a cuminsa cuestiona e situacion seriamente con un minister por bisa ‘I don’t give a damn’, envez di responsabiliza su mes pa e posibel fayonan constata pa un rapport di PWC, y presenta pa e mandatario actual responsabel pa e proyecto. E reunion ta continua durante curso di dia.