CITGO Petroleum no ta muda su headquarter pa Aruba mas

HOUSTON/ORANJESTAD – CITGO Petroleum no ta muda su headquarter pa Aruba mas. Nan a informa awe cu nan ta tene nan headquarter na Houston mes, cabando cu e speculacion di e posibel mudanza. Asina e portal Houston Chronicle ta raporta. Desde e detencion di 6 di su ehecutivonan riba cargo di corupcion na November aña pasa, su futuro ta na duda. E ehecutivonan (5 tin ciudadania mericano tambe) ta deteni ainda na Venezuela. Sinembargo mester añadi cu e fuente no ta uno oficial di gobierno, pues no por a confirma si realmente esaki ta e caso. 

NOMBRACION

Despues gobierno di Nicolas Maduro a nombra Asdrúbal Chávez, primo di ex presidente Hugo Chávez como CEO di CITGO. Chávez a yega Houston siman pasa. Por lo menos un medio a raporta cu despues di e cambio di CEO, cu CITGO tabata considerando move su headquarters pa Aruba, unda cu CITGO tin un refineria tambe. Sinembargo Maduro a corta tur relacion comercial cu Aruba y otro islanan pa motibo di preocupacion di contrabanda.

REUNION

Diahuebs awor combersacionnan na nivel halto di gobernacion ta sigui na Aruba, unda cu ta spera e ehecutivonan Venezolano y di Corsou bek riba e isla pa posiblemente finaliza e combersacionnan maratonico cu a cuminsa diabierna ultimo y caba sin un acuerdo firma, pero si cu un concepto di acuerdo. Fuente: Houston Chronicle, foto cortesia CITGO.