Kock: Protesta mester cambia maneho di Kill Cage na Wayaca

ORANJESTAD – E forma con departamento veterinario ta pone cacho y pushi drumi, ta cuestionable. Como tal un di e fundacionan cu ta rescata bestia riba caya, Crijojo Trappers ta protesta diamars atardi 5’or na e ‘popularmente’ yama Kill Cage of ‘Afmaakhok’ di veterinaire dienst na Wayaca. E meta segun e lider di proyecto Mervine Kock, ta pa concientiza nos hendenan kico ta tuma lugar eynan y pa trece cambio na e proceso cu ta pone e bestianan drumi. Asina Kock a bisa den e programa NoticiaCla LIVE riba Facebook.

CUESTIONABEL

Segun Kock, nan tin video y informacion cu e forma con ta pone e cachonan y pushi drumi na e sitio, ta inhumano. Videonan obteni y cu posiblemente a wordo saca clandestinamente, lo ta mustra formanan no corecto cu ta opera ora cu ta pone e bestianan aki drumi. Kock, den e programa, a uza como ehempel e caso di e hoben cu tabatin centenares di cacho na su cas y unda cu e departamento di veterinario a yega y inyecta e cachonan y pushi unda cu ta, contal cu nan drumi. Y segun Kock, si bo no hacie corecto, e bestia ta muri berdad, pero di un manera hopi malo. E no por a confirma si den e programa, si manera nan a haci na e cas ey, cu si ta asina ta hacie tambe na servicio veterinario.

PROTESTA

Loke cu Kock y su grupo kier logra diamars atardi, ta pa simplemente concientiza esnan cu ta encarga, cu e forma pa haci e trabou, mester ta mas humano y segun regla internacional. Nan kier tambe ta sigur cu cosnan enberdad ta sosode segun ley. Tanten cu nan no por mira y comproba pa nan mes, nan no ta kere e loke ta wordo bisa. Nan kier entre otro pa bin cierto cambionan na vigor, cu ta entre otro evita cu ora cu hende trece cachonan y pushi den p.e fin di siman, cu nan ta pasa un weekend trankil cu awa y cuminda, prome cu haya nan dialuna pa pone drumi. Ademas kier sigura cu tin guidelines cu ta wordo usa ora di pone cachonan drumi. Awor nan no tin e garantia y siguranza ey. Como parti di nan operacion diamars, for di mainta 10’or nan lo ta eynan pa bay cu tur cacho y pushi cu wordo laga eynan, y wak si nan por yuda nan cu sterilizacion y ubicacion di un hogar nobo. E bestianan aki ta termina eynan pasobra e doñonan no por wak mas pa nan, pa cualkier motibo. Entre 4000 pa 5000 cacho y pushi ta wordo deposita eynan tur aña (e tabata 8000 algun aña pasa) na e kill cage.

FUTURO

Pa Kock, ta conciente cu e kill cage lo no disparce awor, y no mester tampoco, contal cu e proceso cu ta uza pa pone e bestianan drumi, ta sosode di un forma humano. Eventualmente despues di algun aña di concientizacion, ta spera si cu por elimina e cage aki. Ta netamente pasobra nos hendenan no ta conciente y of no kier siña con pa ta doño responsabel di bestia, cu a surgi e necesidad di e kill cage. Ta intencion di e grupo pa concientiza tur hende con pa anda cu bestia, y finalmente para e operacion despues di algun aña di e kill cage.

FAMA

E problema pa Aruba, ta cu pa hopi aña, cada pasa tempo ta surgi un of otro video of raportahe riba rednan social di casonan di bestia maltrata na e kill cage. Esaki ta subi internet y ta bin den bista di entre otro turistanan cu ta haya repudio di Aruba y ta evita di bin nos isla pasobra ‘nos no sa con pa deal cu bestia’. Hopi biaha hende ta bisa cu e forma con bo ta trata bo bestianan, ta e forma con bo ta trata hende y anda. Y esey ta causando un propaganda hopi malo pa Aruba, specialmente pa e hecho cu nos ta un isla turistico. Y e tipo di propaganda ta sumamente negativo pa nos isla. Y e departamento concerni ta conciente di esey, te pa nan a pone un conferencia di prensa un dia prome cu e protesta, pa purba spin e parti negativo den uno positivo cu informacion valioso di con realmente ta anda cu e bestianan ora di pone nan drumi.