Parlamento a aproba cuenta anual di 2012

ORANJESTAD  – Parlamento a aproba cuenta anual di 2012, aunke cu esaki tabatin varios fayo den dje. E tratamento mes a cuminsa for di diaranzon mainta .Minister di Finanzas Angel Bermudez a admiti cu tanto e cuenta anual 2012 como esun di 2013 no por wordo cualifica como perfecto, “E calidad di e cuenta anual y di e organisacion administrativo di Gobierno for di cual e cifranan ta origina no ta di tal nivel ainda cu esaki lo por resisti completamente e test di Centrale Accountants Dienst y di Contraloria General”, Minister Bermudez a expresa.

Segun e mandatario, den e cuenta anual di aña 2012 tin gastonan cu no tabata presupuesta. “E gastonan aki no tabata conoci durante preparacion ni di e presupuesto ni di e presupuesto supletorio pa aña 2012 y hopi biaha e gastonan aki ta origina di factornan cu gobierno no por premira” e mandatario ta sigui bisa. Por ehempel for di areglonan legal nobo of huicionan legal y tambe fayonan den e sistema di contabilidad y e disciplina administrativo cu por ta causa cu cierto gastonan di e aña anterior ta presenta y consecuentemente ta causa excesonan den e presupuesto.

“Esakinan ta algun di e motibonan principal dicon e comparacion di e cifranan realisa cu esunnan presupuesta no semper ta facil”. Un cos si ta sigur cu e mandatario di Finanzas ta promove transparencia mas tanto posibel y segun e mandatario, ta su ‘sincero intencion pa trece mehoracion den e proximo cuentanan anual.’

Bermudez a informa cu lo sigui traha riba mehoracion di administracion financiero di gobierno y ta spera cu pronto e lo por comparti e resultadonan cu e Parlamentarionan. Tambe e mandatario ta enfatiza cu un punto cardinal lo ta pa ocupa e puestonan clave den e departamentonan, cu empleadonan cu preparacion adecuado, pa asina mehoracionan por wordo realisa manera debe ser.