Tin solucion pa reduci e ‘presion’ na Spoed Eisend Hulp

ORANJESTAD – E introduccion di dos docter di cas extra na Spoed Eisend Hulp mester yuda reduci e tempo di espera ora cu un pashent ta na e departamento ey di hospital. Asina minister di Salud Dangui Oduber a bisa dialuna mainta den un conferencia di prensa. Segun Oduber, tin dos localidad habri na hospital unda cu AZV lo cubri dos huisarts cu ta specialmente atende y asisti tur caso di emergencia. E pashent cu yega, lo wordo trata. Esun cu resulta di no ta emergencia, e 2 docternan di cas lo trata. Asina e mandatario lo kier baha presion riba SHE, y reduci tempo cu pashent ta warda pa ayudo medico. Awor ta buscando si tin docter di cas disponibel cu por cuminsa di biaha, y si ta pa e minister, esaki por cuminsa dentro di un luna caba. “Pero por lo menos ya tin palabracion entre hospital i AZV pa cubri e gastonan” Oduber a bisa.

TARDANSA

Un di e problemanan di salud ta e tempo cu ta tuma pa trata pashent na loke nos conoce popularmente como ‘Eerste Hulp’, pero cu oficialmente yama Spoed Eisend Hulp. Segun e mandatario, pa dia tin 100 pa 150 persona ta bin SEH, siendo cu ta apenas 30 ta realmente casonan di emergencia. Y esey ta trece e tardanza den ayudo. Cu e solucion aki, e mandatario ta sigur cu por trece un reduccion na e tempo di warda, cu personanan cu acudi eynan, mester experiencia.