Vd Berg: Ta pone bestianan na afmaakhok drumi di forma humano

ORANJESTAD – Servicio veterinario ta pone tur bestia cu keda laga atras na e asina yama ‘afmaakhok’ of ‘kill cage’, drumi den un forma responsabel, humano y segun standard internacional. Asina hefe di e departamento Riem vd Berg a sigura durante un conferencia di prensa dialuna atardi. E conferencia tabata uno di urgencia, den un intento pa evita cu diamars awor un grupo di persona tene un accion di protesta na e sitio. Vd Berg a purba sigura na varios momento cu ta e unico forma cu tin aworaki pa resolve e problema di sobre poblacion di bestia. E otro forma segun vd Berg, ta concientizacion pa ta un doño responsabel di bestia.

PROTESTA

Segun e grupo cu kier protesta diamars, nan no ta di acuerdo con cos ta bayendo eynan y kier pone sea un fin na e proceso ey y of bin cu un otro solucion. E protesta ta poni pa diamars 5’or. Segun hefe di departamento di salud Jerry Staring, ta lamentable cu un biaha mas mester tene un conferencia riba e operacion di e afmaakhok. Segun Staring, e ta un realidad cu tin un afmaakhok, cu mester a bira necesario pa motibo cu tin falta responsabel pa tratamento di bestia na Aruba. Si no ta pa e afmaakhok, hende lo pone e bestianan riba caya, cu chens cu e problema di sobre poblacion di bestia por escala mas pio ainda. A purba motiva pa doñonan di cacho y pushi steriliza esaki, aunke cu esaki no ta echt tuma lugar manera mester.” Pero lamentablemente esey no ta yega pa cubri full area di bestianan no desea”. Van de Berg a sigui splica con e proceso di euthanasia ta tuma lugar, y pa sigura cu tur cos ta bay di un manera profesional, y no manera ta wordo bisa riba Facebook, cu ta mata e bestianan den grupo y ta haci esaki di un forma cruel. Vd Berg a lamenta cu den e caso aki ta uza social media pa plama noticia infunda, incorecto, cu ta haci cu nan tin cu bin dilanti atrobe cu clarificacion. A mustra cu por lo menos pa aña ta trece entre 4 pa 5000 cacho y pushi na e lugar, unda cu mayoria ta wordo poni drumi. Apenas 4 pa 5% di nan ta haya un di dos chens, ya cu simplemente no tin lugar mas pa tene nan na un shelter pasobra esaki semper ta yen.” Mester educa e hendenan segun nan responsabilidad y tin cu mantene nan mes na dje. Si hende no kier pa mata e cacho of haya puppy, mester steriliza esaki tambe. Parti di responsabilidad di ta doño di cacho”. Segun vd Berg, cambia e nomber, no ta un opcion pasobra e nomber ta indica kico ta tuma lugar, esta cu en berdad ta mata e bestianan, pero no den e forma cu ta kere. Aunke no a haci mencion di dje, e posibilidad ta pa elimina e afmaakhok, pero e ora e pueblo mester ta responsabel cu nan bestianan. A sigui splica cu mayoria di cachonan cu ta wordo laga atras ta cachonan puppy, y tur ta sano. Segun vd Berg, si nan subi riba caya, y no ta steriliza, por imagina cuanto cacho extra lo tin dentro di 10 aña di tempo. A puntra cu si mustra con e proceso ta tuma lugar, no ta positivo tampoco pasobra e no ta un proceso ‘bunita’