Polis cu condicion mas estricto pa permiso di manifestacion

ORANJESTAD – Polis a dicidi cu ta adapta condicion pa otorga permiso di manifestacion. Esaki ta e declaracion cu mando policial a bin cune diaranson atardi laat. Alto comisario di polis Dolfi Richardson no ta haci mencion di kico e cambionan aki lo ta, sino solamente cu nan ta mas estricto. E detauyes, Cuerpo Policial lo kier adapta den dialogo cu e stakeholdernan envolvi. Pa cu e tardansa den reacciona, KPA ta mustra cu mester a analisa y evalua tur suceso pa por a formula ‘un opinion bon balansa’.

"Cuerpo Policial Aruba ta un organisacion masha auto critico. Nos ta evalua nos mesun prestacionnan continuamente y unda necesario, nos ta adapta nos maneho tambe teniendo cuenta cu e impacto den nos comunidad", Richardson a sigui bisa. "Aki nos por pensa por ehempel den e maneho di ki ora ta envolvi nos ekipo di Mobiele Eenheid of nos ekipo di cachonan K-9 durante un manifestacion".

Richardson ta sigui bisa cu Cuerpo Policial ta un organisacion cu ta respeta e derecho riba manifestacion. “Ta pesey ta coopera mas cu ta posibel, den otorga permisonan pidi. Pero di otro banda, e mesun cuerpo di Polis tin e deber pa garantisa siguridad di tur ciudadano.”

"Pa por maniobra den e campo di bataya aki por bira un trabou compleho y, hopi biaha, sa trece e organisacion policial den un situacion fastioso, mayoria bes debi na falta di conocemento", asina mr. Dolfi Richardson a splica. "Mester sali for di e punto di bista cu Cuerpo Policial ta neutral den e discusionnan aki y ta envolvi unicamente den mantencion di orden publico". Y ta den e cuadro aki mes tur ciudadano mester compronde cu Polisnan lo actua pa reestablece orden publico, asina cu nota cu e ta core peliger!

"Polis a nota cu ultimo tempo e emocionnan durante manifestacionnan ta subi, specialmente teniendo cuenta cu e manifestacion dilanti oficina di Gobernador y dilanti Bestuurskantoor", asina e Alto Comisario di Polis a admiti.

Den e mesun rosea el a enfatisa si cu "E hecho cu e risico a cambia y cu Polis mester sigui garantisa orden publico na tur momento y bou di tur circunstancia, ta dicidi pa cambia e rekisitonan na momento di haci peticion pa manifestacion. E cambionan lo encera un maneho mucho mas streng pero cu Cuerpo Policial lo kier adapta den dialogo cu e stakeholdernan envolvi. "Mi ta haci un apelacion dramatico riba tur stakeholder pa conhuntamente nos haci tur posibel pa evita cu situacionnan ta bay for di man. Esaki sin duda lo no ta na beneficio di Aruba", asina Alto Comisario di Polis, mr. Dolfi Richardson, a termina bisando.