Van Raak: CITGO no a permiti delegacion Hulandes entrada na refineria

ORANJESTAD - E refineria CITGO no a permiti e delegacion Hulandes di drenta den e refineria. Asina e parlamentario Ronald van Raak pa partido SP y vocero pa asuntonan di Reino Hulandes den Tweede Kamer a bisa den su columna, un dia despues cu e tabata di bishita na Aruba. Den su funcion como columnista, a raporta su bishita den e portal The post Online bou di e titulo, "Loke mi no a wordo permiti pa mira". Fuera di a repasa su bishita completo, el a dedica tempo na e bishita di e delegacion na e refineria, pero no tabatin bon palabra pa esaki. "Na e refineria, e portanan a keda duro cera. Nos a pidi e compania CITGO pa un combersacion, pero nan a nenga pa ricibi delegacion di Tweede Kamer" van Raak ta sigui bisa. 

DUDA

Segun van Raak, danki na e crisis na Venezuela, e futuro di e refineria a bira 'insigur'. "Ta sorprendemi cu Aruba kier restart e refineria bieu, hunto cu e compania Mericano-Venezolano CITGO" e parlamentario a sigui bisa. "Hopi politico (na Aruba) a sigura nos e siman aki cu e proyecto aki lo sigui, aunke cu Venezuela ta den crisis. Pero nos kier a mira esaki cu nos propio wowo". 

BISHITA

Segun van Raak, manera ta custumber fuera di reuni cu politico, ta haci bishita tambe na varios sitio. Entre nan e refineria, 'pero aki e porta a keda duro cera'. Despues cu (manera ya relata), e delegacion no por a drenta e refineria, a pidi gobierno di Aruba pa por a mira e progreso di e refineria. "Pero nan a tene nos bus 'celosamente' for di e tereno". Esey a pone cu riba nan propio iniciativa, van Raak y colega di VVD Andre Bosman a bay cu un periodista na e sitio un dia despues, y a subi e tereno sin problema. "Esey tabata basta facil, pasobra no por a mira niun hende. Nos no a haya ningun señal cu e refineria a cuminsa, y loke si nos a mira ta un tereno bandona cu hopi 'desecho'. Segun van Raak, ta un señal cu den Reino, Aruba ta drentando un avontura politico y financiero insigur, mientras cu ta purba burla di politiconan Hulandes cu cifranan incorecto y weganan politico. Esaki mientras cu Hulanda dentro di Reino ta responsabel pa bon gobernacion y finanzas sano. Mas pio, ta cu di e manera aki, nos ta entrega nos mes na Venezuela" van Raak ta finalisa bisando. 

Fuente: The Post Online , foto cortesia The Post online