Boycott di Aruba lo perhudica Insel Air Aruba tambe

ORANJESTAD – Si Aruba continua cu su boycott contra Surnam manera cu e la anuncia, pa straño cu e ta zona, e lo afecta Insel Air Aruba tambe. Esaki su CEO, Frederick Nuboer ta confirma na NoticiaCla.com diaranson atardi. Mientrastanto e situacion ta cu Surnam no a cumpli cu e peticion di gobierno di Aruba, pa reacciona riba e asunto di Insel Air Aruba. Por lo menos, te cu diaranson atardi, Nuboer no a tende nada.

Diaranson mainta ainta NoticiaCla.com tabatin contacto cu minister di Transporte di Aruba, Otmar Oduber cu a desmenti noticianan inicial for di Surnam cu e relacion entre e dos paisnan tabata ‘resolve’ y cu tur cos tabata ok atrobe. “Absolutamente. Esey no ta berdad” Oduber a sigura NoticiaCla.com. Mes momento e mandatario a desmenti cu e la revoca e ‘ultimatum’ manera cu Surnam tabata pretende. “Mi no a trek ningun ultimatum aden” Oduber a sigui bisa.

Riba e comunicado di diaranson mainta tambe Nuboer a reacciona y a desmenti e informacion ey tambe. “Nos no a ricibi nada for di Surnam” Nuboer a bisa. E unico comunicacion cu Insel Air Aruba tabatin tabata uno breve cu e departamento di aviacion civil di Surnam (CASAS) dialuna, unda cu den cuestion di rato a aproba e peticion di aterisahe via un jamada telefonico, solamente pa revoca esaki algun rato despues via email.

Si gobierno di Aruba para ariba su ultimatum y cuminsa e proceso di para Surinam Airways di bula pa Aruba, e lo perhudica Insel Air Aruba. Esaki pasobra e ta nifica mas gasto pa e aerolinea di Aruba, ya cu ta Insel Air Corsou tin cu bay bula e ruta pa Surnam via Corsow. Algo cu no ta loke nan ta propaganda y cu no ta e idea. Financieramente e ta costa hopi mas placa pa haci esey segun Nuboer na NoticiaCla.com. Mes momento sinembargo, no por stop esaki pasobra e ta perhudica e clientela. “Con cu bay bin, si no ta directo, ta via un otro destinacion” Nuboer a bisa. E no ta placentero segun e CEO, pasobra ‘bo tin cu bende algo otro cu bo ta realisa”. Y e publico viahero ta esun cu ta perhudica. Lo no para e buelonan, aunke cu e lo no ta den e situacion di mas ideal den bista di Insel Air Aruba. “Pero tanten cu tin demanda nos lo sigui ofrece servicio”. E demanda ta grandi, si mira cu a cuminsa cu un frecuencia di 2 biaha pa siman, y a aumenta esaki te na 3 biaha. Y tin mas posibilidadnan grandi cu por ehecuta. Foto archivo di curacaochronicle.