ARA ta keda preocupa pa e situacion financiero di Aruba

ARA ta keda preocupa pa e situacion financiero di Aruba

Posted on 01/11/2018 9:56 am AST | Updated on 01/11/2018 11:01 am AST

ORANJESTAD – Mientras cu tin mehoracion notabel den resultado financiero pa aña 2016, Algemene Rekenkamer  (ARA) ta keda preocupa. Asina ta resalta den e rapport di Algemene Rekenkamer publica awe mainta encuanto investigacion di e cuenta anual di Pais pa aña 2016. Den e rapport aki pues Algemene Rekenkamer ta indica cu tin mehoracion notabel den e resultadonan financiero pa aña 2016 compara cu aña 2015, pero cu e mehoracion aki no ta a consecuencia di un maneho structural di controla gastonan pa yega na sostenibilidad. Algemene Rekenkamer ta keda preocupa pa e situacion financiero di Pais. E preocupacion aki ta basa riba tres elemento cardinal di e investigacion aki, cu ta e debe di Pais, e gastonan di interes riba e debe di gobierno y e gastonan di personal di e Pais. Algemene Rekenkamer ta conclui cu ainda tin un caminda pa cana prome cu por yega na sostenibilidad di finansas publico.

Norma di deficit pa aña 2016

Gobierno a defini e sector colectivo pa prome biaha na aña 2016 y a raporta riba e resultadonan den cuenta anual di Pais di aña 2016. Gobierno ta conclui cu e sector colectivo a cumpli cu e norma di deficit di 2% PNB. Algemene Rekenkamer no por determina for di e investigacion cu e conclucion di gobierno ta corecto. Esaki pa motibo cu e cifranan di un parti di e sector colectivo cu a uza den e cuenta anual 2016 di Pais, ta consisti di cifranan cu no ta estableci ainda.

Algemene Rekenkamer ta conclui cu gobierno ta realisa su mes di e importancia pa cumpli cu e normanan presupuestario pa yega na sostenibilidad di finansas publico. Sinembargo, Algemene Rekenkamer ta constata cu e medidanan structural, cu mester ta e base pa cumpli cu e medidanan presupuestario, sea no a tuma ainda of no ta aplica nan suficientemente. Asina e investigacion di e cuenta anual ta indica cu e rebaho den gastonan atrobe no ta consecuencia di un maneho structural, pero di sucesonan incidental. Resultado di e maneho di e dos gastonan operativo mas grandi, specificamente e gastonan di interes riba e debe di gobierno y gastonan di personal di e Pais, ta mustra cu gobierno no a logra implementa un maneho structura di e gastonan. Gobierno tin un caminda pa cana ainda prome cu por papia di finansas publico sostenibel na Aruba.

Derecho presupuestario di Parlamento

Algemene Rekenkamer ta constata cu pa aña 2016, mescos cu añanan anterior, gastonan ta bolbe surpasa presupuesto riba e nivel di autorisacion di Parlamento, cual ta considera como ilegitimo. Cumplimento cu stipulacionnan di ley di comptabilidad y uzo di instrumentonan cu ta na disposicion, lo aporta na realisacion di un miho maneho di e presupuesto pa minister di Finansas, demas ministernan y Parlamento. Un ehecucion di e presupuesto aceptabel, por aporta na proteccion di y cumplimento cu e derecho presupuestario.

Recomendacion Algemene Rekenkamer

Algemene Rekenkamer ta recomenda e ministernan pa no perde e sostenibilidad di finansas publico for di bista, tanto durante preparacion como den ehecucion di e presupuesto. Mester percura pa durante e ehecucion di e presupuesto, cumpli cu e leynan prescribi. Ta hopi importante pa tur minister pone nan mes den e posicion pa por supervisa e parti di e presupuesto otorga na nan, na un manera eficiente y efectivo. Ta recomenda na minister di Finansas pa crea e sosten necesario pa di berdad tuma e pasonan pa logra un finansas publico sostenibel. Ta importante pa garantisa continuidad di e mehoracionnan realisa, specialmente den e parti di maneho financiero. Na e minister di Finansas, como supervisor di e gastonan di e Pais, ta recomenda pa percura pa e cumplimento cu e leynan prescribi durante ehecucion di e presupuesto.

Ta recomenda na Parlamento pa supervisa, na un manera critico, e prioridadnan y escogencianan di e gobierno cu bista riba e sostenibilidad di finansas publico. Algemene Rekenkamer ta recomenda tambe pa no tolera mas, cu ta perhudica e derecho presupuestario. Ta sumamente importante pa Parlamento haya e informacion necesario na tempo, p’asina por eherce su tarea na un manera eficiente y efectivo. Algemene Rekenkamer ta recomenda tambe pa keda critico riba tratamento di e cuentanan anual, den cual ta duna responsabilisacion di e maneho realisa. Por ultimo ta recomenda pa keda envolvi den e proceso di mehoracion di e maneho financiero.

Reaccion di minister di Finansas

Minister di Finansas a duna su reaccion riba e rapport di Algemene Rekenkamer dia 19 di december 2017.

Algemene Rekenkamer ta aprecia e reaccion extenso di e minister riba e conclusionnan di e rapport. Den su reaccion e minister ta reconoce e situacion financiero precario cu Pais Aruba ta aden y ta declara cu Gobierno ta dun’e su prioridad. E minister ta indica cu e Gabinete di Coalicion ta duna di conoce cu den futuro lo tuma e pasonan cu mester pa pone finansas publico na ordo y alabes realisa un crecemento den desaroyo economico. Algemene Rekenkamer ta haya e reconocemento colectivo importante pasobra asina por crea e sosten necesario y acuerdo comun bou di e ministernan cual ta importante pa por realisa e sostenibilad di finansas publico y e crecemento economico.

Algemene Rekenkamer lo monitor e desaroyo riba e recomendacionnan periodicamente, y unda ta necesario lo controla esaki. Na e manera aki Algemene Rekenkamer lo keda entrega un contribucion pa realisa sostenibilidad di finansas publico, incluyendo e trayecto di mehoracion di e maneho financiero y realisacion di un cuenta anual di Pais Aruba controlabel.

Algemene Rekenkamer kier menciona tambe cu desde 19 di december 2017 nos miembronan ta completo atrobe, cual ta pone cu legalmente nos por tuma decisionnan atrobe. Pa e motibo aki nos di Algemene Rekenkamer por, for di e fecha menciona, haci nos rapportnan definitivo y entrega esaki na e minister di Finansas. E version digital di e rapport di Algemene Rekenkamer ta obtenibel via www.rekenkamer.aw

  • DIMP: BAZV ta conoce cambio entrante 1 di juli

    DIMP: BAZV ta conoce cambio entrante 1 di juli

    ORANJESTAD – Departamento di Impuesto a informa den un comunicado cu entrante 1 di juli 2018, tin algun cambio den e ley di BAZV. Siguientemente ta sigui un splicacion cortico relaciona cu algun di e cambionan pa cu BAZV.

  • Aruba Banki cu opcion di self service nobo di e-Appointment 24/7/365

    Aruba Banki cu opcion di self service nobo di e-Appointment 24/7/365

    ORANJESTAD - Pa yuda bo spaar tempo, Aruba Bank ta introduci e opcion di self-service nobo, e-Appointment. Awor tur persona cu mester bishita un di e sucursalnan di Aruba Bank tin tempo pa planea su bishita ora ta cumbini’e y por scoge e sitio cu e ta prefera, for di e comodidad di su cas of oficina. E opcion online ta disponibel uzando cualkier computer, tablet of Smartphone. Pa haci un cita sigui tres (3) stap simpel:

  • Diaranson Departamento di Impuesto diaranson ta habri mainta solamente

    Diaranson Departamento di Impuesto diaranson ta habri mainta solamente

    ORANJESTAD – Departamento di Impuesto ta participa cu su horario di servicio na publico lo ta diferente diaranson, dia 20 di juni 2018. Tur oficina den distrito y e oficina principal na Camacuri lo ta habri te cu 11:30 di mainta. Parti atardi lo ta cera, debi na un training interno pa e personal. Esaki ta conta tanto pa e seccion di Servicio di caha como e seccion di Servicio na cliente.

  • Ridderstap: Cu Lotto online, a bin un grupo nobo acerca cu ta cumpra lotto

    Ridderstap: Cu Lotto online, a bin un grupo nobo acerca cu ta cumpra lotto

    ORANJESTAD – Un siman despues cu Lotto a introduci e posibilidad pa cumpra lotto ‘online’, e persona responsabel pa mercadeo y publicidad Damaris Ridderstap ta contento. Segun Ridderstap, e prome reaccionnan tabata hopi positivo. Mes momento e ta conciente si cu ta hopi tempran pa tin un bon bista di e impacto. Lo dura por lo menos 2 luna prome cu nan por bisa berdaderamente kico e impacto tabata, pa midi con grandi e impacto tabata. Pero e mercado nobo a nace y ta creciendo.

  • Desaroyadornan Isla di Oro posiblemente interesa den otro sitio

    Desaroyadornan Isla di Oro posiblemente interesa den otro sitio

    ORANJESTAD – E hecho cu e proyecto hotelero na Isla di Oro no ta sigui mas (gobierno a nenga permiso oficialmente siman pasa), no ta kita cu e ta keda un proyecto interesante pa pais Aruba. “Ademas e no ta kita cu e proyecto aki, manera cu e desaroyadornan a tuma contacto, lo ta interesa pa mira un otro posibilidad pa loke ta trata localidad pa por desaroya un tipo di proyecto asina”. Asina minister di infrastructura Otmar Oduber a bisa dialuna mainta durante un conferencia di prensa. E desaroyadornan mes, no a reacciona ainda riba peticion di e portal aki. 

  • BCA: Entrante 2019 banconan por procesa pagonan instantaneo cu otro online

    BCA: Entrante 2019 banconan por procesa pagonan instantaneo cu otro online

    ORANJESTAD – Entrante 2019, banconan na Aruba por procesa tur pago na florin entre banco inmediatamente, estilo real time. Asina Banco Central di Aruba (BCA) a anuncia diabierna. Esaki ta posibel awor cu BCA a asocia su mes cu EquensWorldline pa lansa e sistema di pago instantaneo na Aruba. EquensWorldline SE ta e lider Europeo den e industria di pago y servicionan di transaccion, pa suministra un infrastructura nobo y central pa sistema di pago instantaneo, y lo reemplaza e sistema actual di “clearing & settlement” di BCA entrante januari 2019.

  • Powered by SETAR