Oduber: Man duro riba tur tereno den wetland otorga pa Gobierno anteri

ORANJESTAD – Gobierno lo actua cu man duro riba tur tereno den wetland cu a keda otorga pa gobierno anterior. Segun un comunicado di gobierno, diaranson atardi un acto/situacion sumamente lamentable a wordo constata na Saliña cu un tereno den Wetland. Locual cu a constata ta cu trabaonan di construccion a cuminsa tuma luga riba un tereno cu segun nos ROP mester wordo destina como areanan pa conserva. E area en cuestion ta importante pa nos medio ambiente y entre otro ta yuda pa colecta awa ora di yobida.

Robert Kock consehero di Ministerio di Infrastructura y Medio Ambiente ta splica cu e situacion aki ta inaceptable. E tereno ta den Wetland y pues ta un tereno cu no por wordo duna. Sinembargo ta constata cu apesar di esaki toch e tereno aki a wordo otorga den periodo di gobernacion di Gobierno anterior. E tipo di situacionnan aki lo no bay wordo tolera y un reunion cu caracter di urgencia lo wordo yama pa cuminsa cu investigacion riba e caso aki y varios otro situacionnan di opcionnan di tereno cu a wordo duna riba tereno den Wetland.

Segun e comunicado, e gobierno anterior no tabata respeta naturaleza y e derecho di existencia di naturaleza. Locual at sumamente lamentable tambe ta cu e consecuencia di e decisionnan aki lo no wordo mira aworaki di biaha, sino mas na cabamento di aña, October bay dilanti ora cu awa cuminsa yobe fuerte.

A sigui mustra cu e maneho di e gobierno actual di Gabinete Wever – Croes lo bay fomenta mas den direccion di proteccion di e areanan aki. Si e areanan aki cuminsa wordo otorga, lo no tin mucho espacio pa naturalesa mas, cu tur e consecuencianan negativo cu esaki lo tin pa nos medio ambiente. Maneho di Minister Otmar Oduber ta dirigi riba proteccion di e areanan aki cu ta destina pa naturaleza y lo bay actua pisa riba e tipo di accionnan aki y lo tin sanccionnan cu lo bay bin tambe, sr. Ghisberto Figaroa consehero di Ministerio encarga cu Infrastructura y Medio Ambiente a enfatisa.