Gomez: A lansa servicio pa paga tur tipo di impuesto ‘online’

ORANJESTAD – Cu mehoracion di servicio na cliente den mente, departamento di impuesto diaranson a anuncia cu Aruba Bank a keda cla cu e rekisito nan pa online payment di tur servicio cu departamento di impuesto ta ofrece. Directora di e departamento, Luenne Gomez-Pieters tabata contento pa por a haci e anuncio aki. Pa clientenan di e departamento, fuera di pago online di antes, aworaki e ta un sistema mas structura unda cu por duna tur informacion adicional tocante e pago. Algo cu tabata necesario pa facilita departamento di impuesto su administracion.

ADMINISTRACION

Segun Gomez, cu e cambio aki e ta duna e departamento un alivio grandi na e clientenan cu ta paga. Despues di diferente reunion den grupo di trabou, a delinea cu e banco en cuestion, e rekisitonan necesario y con e departamento kier wak esaki den futuro. “Awe nos ta launch e online payment system, caminda cu e cliente por haya un ‘drop down’ (lista di opcion riba e sistema) di tur e impuestonan cu por paga via e sistema online di banco. Por pone te hasta un persoonsnummer, un betalings kenmerk y e suma cu ta wordo paga” Gomez a sigui bisa. Aruba Bank ta e prome banco cu a keda cla y e otronan ta den proceso pa keda cla.

TEMPO

Mientras cu ideal lo tabata cu e sistema ta opera den real time, esta manera cu bo transferi e placa e ta yega riba e cuenta di departamento di impuesto, e ta un adelanto grandi. Mester tene na cuenta si, cu unabez cu un persona usa e servicio, e ta dura un pa dos dia di tempo pa e departamento por registra e pago, y ta dura algun dia mas prome cu e persona por ricibi su comprobante, y of p.e. sticker di number di auto den e caso specifico ey.