Cumbre na Aruba diabierna riba embargo Venezolano

ORANJESTAD – Reino Hulandes y Venezuela ta tene un reunion oficial na Aruba diabierna riba e embargo impone pa Venezuela contra islanan ABC. Lider di D66 Alexander Pechtold y miembro di VVD Andre Bosman a confirma esaki pa partner di noticia pa NoticiaCla, Caribisch Netwerk. Tanto Pechtold y Bosman ta na Aruba pa e reunion interparlamentario di Reino actualmente. Ta trata topico di interes general durante e dianan aki. Entre nan, tabatin ayera un presentacion di e situacion actual di Venezuela, tras di porta cera.

CONTRABANDA

Diabierna ministerio Hulandes di relacionan exterior lo reuni cu autoridad Venezolano. Pechtold ta premira cu Hulanda hunto cu resto di Reino Hulandes ta bay anuncia cu lo intensiva actividad di Warda Costa pa loke ta e proteccion contra contrabanda di entre otro koper, coltan, y otro materia y cu ta serio riba e asunto ey. Pechtold a bisa cu ta spera cu despues di e reunion aki, por lanta e embargo actual. Bosman a bisa cu islanan ABC y Hulanda ta dispuesto pa duna nan parti pa bringa e contrabanda.

CRITICA PROME MINISTER

Bosman a yama e proposicion di Wever Croes pa manda e refugiadonan di Venezuela cu yega Aruba y Corsou, pa Bonaire no corecto. Bosman a bisa cu a adverti pa hopi tempo caba pa un posibel crisis di refugiado. “Mi a bringa pa introduccion di visa pa Venezuela, pero riba insistencia di gobierno di Aruba, a wanta esaki”, Bosman a bisa. Como tal gobierno Hulandes no a tuma accion riba e parti ey. “Si diripente el a bira un problema, e no por ta asina cu e ta bira mi problema e ora”. Segun Pechtold, tanto Wever Croes como Bosman ta adelantando nan mes riba e situacion. El a yama ambos pa tene cabez friew te ora cu e reunionnan tuma lugar diabierna.