FTA: Banco ta haci dificil pa trahadornan afilia na sindicato

ORANJESTAD – E banco Caribbean Mercantile Bank (CMB) ta haci dificil pa su trahadornan (total di riba 150 di mas di 300) afilia na sindicato FTA oficialmente. Durante un conferencia di prensa di FTA diamars mainta, e representante Rudy Geerman a elabora riba e situacion laboral cu a surgi na e instituto financiero. Banco ta haci hopi dificil pa trahadornan uni na un sindicato y pa reconoce e sindicato, Geerman ta bisa. Segun Geerman e banco a dicidi pa informa e trahadornan na ‘ultimo ora’ di e cambio cu a propone pa haci, cu ta elimina algun beneficio (9) di e trahadonan debi na e situacion financiero. Entre nan bonus y bashi premie (cu ta e siman aki mes segun abogado di FTA) cu ta keda elimina e siman aki mes. Na momento cu e trahadornan a dicidi cu nan ta organiza nan mes cu afiliacion na e sindicato, banco a manda un carta pa e sindicato bisando cu ta dispuesto pa papia cu trahadornan ,y splica pakico a tuma tal decision, segun Geerman. “Si e trahadornan no a protesta y acerca un sindicato, e banco lo a impone un cambio riba dje” Geerman a sigui bisa. E sindicato a manda un carta na gerencia e ora, y despues gerencia a manda un carta pa trahadornan cu ‘dolor na curazon’, cu trahadornan a afilia na un sindicato. Segun Geerman, e sindicato FTA no ta compronde e palabranan ey, siendo cu afiliacion sindical ta un derecho minimo cu un trahado tin. E banco no ta respeta e derecho di e trahadornan. E trahadornan di 30 aña a dedica full nan tempo na banco.

CONTESTA

FTA a manda e banco un carta pa reconsidera e desicion tuma. Pero e carta cu banco a manda sindicato como contesta, ta admiti cu nan no por haci nada na e cambionan ya cu nan a drenta na vigor 1 di januari. Geerman ta sorprendi con un banco despues di tanto aña, ta impone cambio sin informa e trahadornan. Segun Geerman, si realmente e situacion ta malo, mester a yama e trahadornan y splica nan pakico a yega na decision. Pero no manda un carta fin di aña, informando di e beneficionan cu ta wordo corta, entrante 1 di januari 2018. Awor cu e trahadornan a organiza, a yama e trahadornan den grupo pa splica nan e motibo pakico a tuma tal decision. Pa colmo a trece (Chicu) Capriles di Corsou pa papia cu e trahadornan. Segun Geerman, CMB ta buscando un paro di trabou prome cu referendum. “Mi kier laga esaki bon cla pa (Chicu) Capriles y (Javier) Wolter, pa no tuma esaki como un menaza sino un advertencia. No keda sorprendi cu e trahadornan protesta prome cu bin un referendum”. A mustra cu CMB ta buscando pa sa ken a bin trece e problema dilanti. Y Geerman no ta acepta esey, pasobra no ta respeta e trahadornan. Segun e representante sindical, e banco tin problema pasobra e trahadornan a afilia mientras cu e banconan si ta organiza nan mes bou di ABA. “Dicon ami por y nan no por. Den e asociacion tin tres otro banco cu FTA tin un CAO firma cu trahadonan. Kico banco tin di sconde pa trahadornan bira miembro?” Geerman ta finalisa puntrando. Awe tardi ta reuni cu e trahadonan y dicidi e siguiente paso. NoticiaCla ta pendiente tambe di un posibel reaccion di parti di e banco mes.