Dangui Oduber ta desmenti cu tereno ex Bushiri ta pa sponsor

ORANJESTAD – Minister di turismo Dangui Oduber a desmenti categoricamente di tin sponsor cu tin cu complace cune pa proyecto di ex Bushiri. Asina e mandatario a bisa NoticiaCla dialuna mainta, contradiciendo parlamentario Marlon Sneek di partido AVP. Sneek, den un programa recien na NoticiaCla LIVE a tilda Oduber di tin sponsor di campaña na ken el a priminti e proyecto, y cu e fam ta cuminsa cu ‘van’. Si den un periodo determina, Oduber no recapacita, Sneek lo a divulga e nomber. Oduber a sigura e portal aki cu nada di esey no ta berdad.

PROYECTO

Sneek recientemente fuera di tilda Oduber di ta mara na sponsor di campaña pa e proyecto ex Bushiri, kier para esun cu AVP tabatin den pipeline, esta un tipo di sporthotel, pues no sigui cune y cambia esaki den un tipo di hotel. Oduber den su prome reaccion siman pasa caba na e portal aki a confirma cu enberdad el a para e proyecto ey, pasobra gobierno actual no ta kere den dje. “Nos a bay campaña y a bisa cu nos lo desaroya un boutique hotel den e area aki. Y den combinacion cu e boutique hotel aki, a presenta un plan completo pa drecha e area completo aki” Oduber a sigui bisa.

COMPROMETE?

“Ningun momento nos no a compromete ningun di e proyectonan aki” Oduber a bisa, refiriendo na e insinuacion di sponsor. A mustra cu e proyecto lo bay segun un destaho publico manera tur otro proyecto. Ademas e ta sigura cu el a tene suficiente fundraising y no uza sponsor specifico cu e lo mester bin complace awor cu ‘proyecto’. “Ami ta sintimi liber den mi consenshi, liber den mi decisionnan. Mi no ta wordo instrui ni guia pa ningun comerciante of inversionista” Oduber a sigui bisa. Si el a admiti cu tin hopi interes pa e proyecto aki.