Rene Herde: Ningun momento a ataca gobernador di Aruba

ORANJESTAD – Fraccion di AVP no ta compronde e actitud di gobernador, y sigur no esun di dialuna anochi. Segun lider di fraccion Rene Herde, e la tuma nota den media dialuna anochi cu gobernador lo a cambia di postura y a ofrece pa yuda gobierno pa cu fiansa di placa. E ta haye un actitud straño ora cu diripiente gobernador por firma e aprobacion pa por fia e mesun cantidad di placa sin presupuesto, mientras cu ta nenga di firma e presupuesto mes. Mes momento Herde a clarifica e postura di fraccion riba gobernador, pa evita cualkier mal comprondemento.

Segun Herde, tin un diferencia hopi grandi entre ataca gobernador, y bringa y defende e funcion. Loke cu segun Herde, e la haci ta di urgi gobernador pa firma e presupuesto. E palabra urgi pa Herde, ta den contexto di urgencia y nada mas. “Ningun momento nos a ataca gobernador” Herde a sigura prensa diamars mainta. Unico cos cu AVP kier ta pa gobernador cumpli cu constitucion. Algo cu segun Herde, no ta sosodiendo. E ta bisa cu ta nos deber pa cumpli cu constitucion. Mes momento e no ta compronde e actitud di partido MEP (cu tin tur derecho di tin desacuerdo cu AVP segun Herde) pa ta bringando AVP, pa esaki. “No por diferencia di opinion riba esey” Herde a subraya.

E la sigui pa referi na varios nomber di professor y periodista di afo. Tur tin den comun, cu nan ta sea cuestiona e actitud di gobernador of di gobierno di Reino. Riba e pregunta cu si Herde ta para tras di e cuestionamento aki, Herde a sigura NoticiaCla cu no . “Nos ta citando nan, haciendo referencia na nan. No ta nos ta bisa” Herde a insisti. Loke pe ta remarcable ta cu te hasta esnan cu ta critica gobierno di Aruba tur dia, awor ta duna e gobierno aki rason den su actuacion.