Oduber: Medida di Venezuela ainda no ta afecta turismo di Aruba

ORANJESTAD - Te cu na e momentonan aki no ta premira consecuencianan grandi pa cu turismo, pero ta sigui e situacion di serca. Asina minister di turismo Dangui Oduber a bisa riba e medida impone pa Venezuela. Na momento cu a confirma e anuncio di President Maduro di Venezuela di sera pa 72 ora e frontera di Venezuela pa e islanan di Aruba, Bonaire y Curacao, mi persona, hunto cu Aruba Tourism Authority a cuminsa compila y monitorea tur comunicacion internacional conhuntamente cu otro departamentonan concerni pa e maneho di Turismo y Transporte di Aruba entre otro DCA (Departamento di Aviacion Civil) y AAA (Aruba Airport Authority) pa inventariza resultado y consecuencia di e decisión tuma.

Na e momento aki por informa cu tin ongeveer 320 pasajero cu lo sali awe di Aruba pa Venezuela y cu tin riba itinerario algún 150 pasajero pa bin Aruba.

Actualmente, Venezuela ta representa 8.9% di nos turismo total un poco mas di 92,000 pasajero. Laser, Aserca y Aruba Airlines ta e compañíanan cu mas ta transporta pasahero pa Aruba.