Oduber: No ta otorga tereno (wetland ) pidi, na grupo De Veer

ORANJESTAD – Gobierno actual ta honra e maneho di e gobierno anterior den e caso di tereno solicita pa grupo de Veer (De Veer Chain Theaters NV), y ta rechasa e otorgamento. Asina minister di infrastructura Otmar Oduber a confirma diabierna mainta den un conferencia di prensa. E mandatario a confirma pa NoticiaCla cu a reuni cu e grupo na varios ocasion, y a bisa nan tanto verbal y por escrito cu lo no otorga nan e tereno cu nan a solicita (wetland) pa e proyecto grandi di cinema. E mandatario a bin dilanti despues cu varios dia tabatin rumornan cu e lo a dicidi toch pa otorga e tereno aki na e grupo. Otro siman corte ta programa pa dicta un sentencia den e caso di apelacion di de Veer pa cu e tereno. Den anticipacion di esaki, Oduber a bin dilanti awe y confirma cu ta honra e actual Ruimtelijke Ontwikkelings Plan (ROP) cu ta prohibi construccion riba e.o. e tereno solicita.

CASO

Aña pasa de Veer a bay corte pa logra haya gobierno pa agilisa e proceso di permiso y otorga nan e permiso necesario pa un tereno solicita na Palm Beach, despues cu gobierno a duna nan e opcion riba e tereno ey na comienso di 2017. De Veer a haya cu tabata tardando cu e proceso y esaki por a trece e proyecto completo na peliger. E caso aki de Veer a perde, dunando gobierno razon y cu gobierno por haya ‘mas tempo’ prome cu dicidi kico ta haci cu e tereno y e peticion. De Veer a apela e sentencia y segun Oduber, otro siman corte di apelacion mester dicta e sentencia.