Sneek: Lo divulga nomber di sponsor di MEP cu lo haya proyecto na ex Bushiri hotel

ORANJESTAD – Partido MEP tin cu acomoda sponsornan di campaña y pesey ta para cu proyecto na ex hotel Bushiri. Y si e minister encarga cu Turismo, Dangui Oduber no recapacita, lo divulga nomber di e sponsor aki. Segun lider di partido di fraccion di AVP Marlon Sneek den e programa NoticiaCLA LIVE riba Facebook, ta berdad cu ta prerogativo di un gobierno pa para of sigui un proyecto di e gobierno anterior. E topico tabata e hecho cu gobierno di MEP a laga sa cu no kier continua cu e proyecto di ex bushiri, esta pa comberti esaki den un tipo di sporthotel. Segun Sneek, e minister encarga cu paramento di e proyecto esta Dangui Oduber kier para e proyecto pasobra e mester complace sponsornan di campaña. A bay asina lew di bisa cu e sponsor ta conoci pa e fraccion y cu e fam di e sponsor ta cuminsa cu e fam ‘Van’. Dado momento si Oduber no recapacita, Sneek a sigura NoticiaCla cu AVP lo bin cu e nomber completo di e sponsornan di campaña.

PARA PROYECTO

Riba pregunta di NoticiaCla, e minister di turismo Dangiu Oduber a confirma cu enberdad no kier sigui cu e proyecto di ex Bushiri. “Logico cu nos no ta sigui plan di gobierno di AVP. Nan kier a bin cu un sporthotel na Ex Bushiri y nos ta diferencia di pensamento cu nan” Oduber a bisa. Segun e mandatario encarga cu turismo, e tin su motibo. “Nos a bisa cu no ta kere den un sporthotel sino den un combinacion di desaroyo. Nos kier un Boutique hotel combina cu beach publico, skatepark y boardwalk pa pueblo” Oduber a sigui bisa. Segun e representante di AVP, nan plan tabata algo otro cu hotel. “E ta keda un beach publico y facilidad riba dje manera baño, kiosko, y ta haci e area manera Surfside. Un desaroyo asina. Low Impact. Nada di hotel” Sneek a bisa. A confronta SNeek cu e ponencia cu kico ta bisa cu AVP tambe no tin sponsor cu tin cu cumpli cune na ex Bushiri, y no solamente MEP. Sneek a mustra cu nan no tin necesidad di esey, y a referi na varios proyecto di AVP unda cu segun nan, no ta trata di acomoda sponsor di campaña, sino ciudadano unicoriente cu ta haya contract di 5 aña, via un destaho publico. “No tin nada di duna ningun sponsor”, Sneek a finalisa bisando.