AVP y MEP ta sigui bringa otro riba retiro di coordinadornan

ORANJESTAD – E caso di retiro masal di varios coordinador a sigui e siman aki cu tanto partido AVP como gobierno di MEP contradiciendo otro riba e tema. Fraccion di AVP mas prome den dia diahuebs a tilda e gobierno di MEP di no a kita solamente coordinadornan cu mester a bay cu e gobierno, sino cu tin hende tambe cu tin añanan largo trahando, y cu tambe a haya carta. Prome minister Evelyn Wever Croes a desmenti e declaracion aki y a yama e acusacionnan aki como un ‘mentira flagrante’, y a reta e persona cu a bisa esey di fraccion di AVP, pa bin cu e documentonan y prueba esaki.

NOTICIACLA LIVE

Riba esaki, lider di fraccion Marlon Sneek a reacciona den e programa NoticiaCla LIVE cu Wever ta manipula atrobe y e no ta kere mas loke e ta bisa. Wever a mustra mas prome cu enberdad tin algun persona cu lo a haya carta tambe siendo cu nan status ta otro. Pero aki tambe a resulta segun Wever, cu mal trabou a pone cu nan asuntonan no a wordo regla y cu lo por wak despues kico por haci pa un grupito cu no enberdad no mester cay den e grupo di retiro aki.

E RETIRONAN

Tabata net prome cu aña bolter cu gobierno a manda un carta pa como 100 pa 300 persona cu nan contracto laboral cu gobierno no ta continua y cu nan lo haya un luna mas di salario paga, pero cu despues, nan contracto lo vence. Un ola di reaccion di parti di e partido di oposicion AVP, cu a yama esaki mesora persecusion politico. Gobierno di MEP a mustra sinembargo cu ta e propio maneho di e gabinete anterior a pone cu tin un maneho diferente cu MEP awor a sigui y cu AVP kier bringa y haci politica cune. Entre nan, un areglo basa riba un sentencia di huez cu a duna e gabinete anterior gana ora cu e gabinete di MEP di e tempo ey (2009) kier a bringa AVP den corte. E maneho ey a bira un areglo cu AVP a bolbe usa na 2013, y cu awor MEP a usa na 2017 y cu pa AVP diripiente ta un problema.