ATA: No mester damage control ainda pa robo contra turista

ORANJESTAD – Pa cu e caso di robo contra un pareha turista Aleman e siman aki, no tin necesidad di ‘activa’ damage control internacional ainda. Asina CEO di Aruba Tourism Authority (ATA) Ronella Tjin Asjoe a sigura NoticiaCla diahuebs. “Pero mas cu claro esaki tambe ta algo cu nos ta monitoria” Tjin Asjoe a sigui bisa. El a mustra cu ATA tabata den contacto estrecho cu minister di Turismo, Husticia y tambe slachtofferhulp y e victima di atraco recien. Ta trata di e pareha cu a keda agredi y herida cu un cuchio riba prome dia di aña 2018. 

KEHOSegun Tjin Asjoe, den casonan asina ATA ta activa esnan den e organisacion cu ta responsabel pa brinda asistencia. Ta un proceso standaard di parti di ATA den tipo di casonan asina. Den tur caso ta wak con por brinda asistencia na bishitantenan y/of autoridadnan conserni.. Ora cu tin algo asina segun Tjin Asjoe, ta activa e departamento aki. “Hopi biaha ta wak con por asisti ( cu e caso)” Tjin Asjoe a bisa e portal aki. Cada caso ta diferente berdad. Den e caso aki a regla acomodacion pa e bishitantenan aki, debi cu nan no kier a keda unda cu nan tabata hospedando. “Algo cu ta comprendibel” Tjin Asjoe a sigui bisa. E sosten mas grandi ta sosode pa medio di ATA su sosten na Aruba Hospitality and Security Foundation. Den contexto aki, a base annual, ATA ta duna un contribucion annual di 720.000 florin. Cierto momento a aumenta esaki na 1.2 miyon florin, y aña pasa a pone un presupuesto di te hasta 5 miyon florin pa compra di ekipo y asistencia pa cu KPA y otro instancianan pa nan por haci nan trabou.