Minister ta anuncia varios medida pa yuda frena inseguridad

ORANJESTAD – Cu un anuncio general awe mainta laat di introduccion y implementacion di varios medida, minister di Husticia Andin Bikker kier purba frena e situacion di inseguridad riba nos isla. Entre nan tin introduccion di drone pa vigila nos isla, re-introduccion di e helicopter, implementacion di un alert button na tur punto di benta di Lotto, introduci e ‘golden tip’, organo di conseho riba tereno di husticia, y un ayudo financiero contra debe. E mandatario a sigura NoticiaCla cu pa mayoria di nan, e implementacion mester bay facil y ta wordo financia cu fondo di combatimento di criminalidad. E unico cu por tin dificultad, ta e re-introduccion di helicopter.

DRONE Y HELICOPTER

E intencion ta pa bin cu e drone como surveillance y lo implementa esaki na varios districo di Aruba unda cu ta sinti cu e por frena tipo di accionan criminal cu nos isla ta confrontando. E helicopter mester vigila y preveni y actua diligentemente segun e mandatario a sigui bisa. Gastonan pa e drone(nan) no ta halto, y por busca esaki mesora. Pero e helicopter si ta mas dificil pa cual lo bin cu un proposicion pa comercialmente esaki wordo busca.

ADVIESORGAAN

E mandatario a papia di implementa un asina yama ‘advies orgaan’ cu tin como meta pa conseha gobierno (los di overleg tur siman cu tur departamentonan ya existente) riba tereno di seguridad y prevencion di criminalidad.  

ALARMBUTTON

Un otro anuncio ta pa sigura e puntonan di benta di lotto na Aruba, pa medio di un asina yama ‘alarm button’. E ta un boton riba cual un rebendedor ta djis primi, cu ta conecta mesora cu central di polis. Bikker a experiencia recientemente un caso di atraco, unda cu e rebendedor a keda asina traumatiza cu e la lubida con pa yama autoridad. “Gobierno lo subsidia e alarm button pa tur punto di benta, y (tambe) camara” Bikker a bisa. Aparte di esey, esnan di menos recurso tambe lo por haya sistema di alarma subsidia, manera cu tin na Hulanda segun Bikker unda cu crimen a keda reduci considerablemente.

SCHULDHULPVERLENING

Lo bin tambe cu un tipo di asistencia pa hende cu a cay den spiral di debe pa sali for di e debe aki. Esey tambe ta bira un problema ora cu hendenan a spaar pa cumpra nan aparatonan, solamente pa perde nan pa motibo di p.e un robo.

GOLDEN TIP

E golden tip ta basicamente un forma conoci di motiva ciudadanonan di comparti informacion cu ta conduci na captura di ladron/criminalnan. E no ta algo nobo, y tin fondo pa esaki tambe segun Bikker.

TEMPO

E mandatario no a duna un tempo fiho pa implementacion di e loke el a menciona, y a bisa cu mayoria di nan ta financeable y tecnicamente realizable den un termino corto. E unico cu tin dificultad, ta e re-introduccion di e helicopter.