Secretario di estado Raymond Knops na Aruba otro siman

DEN HAAG – Secretario di Estado Hulandes encarga cu asuntonan di Reino Raymond Knops ta bishita Aruba otro siman diahuebs 11 di januari. Asina gobierno Hulandes a informa awe mainta. Su bishita ta parti di un bishita di ‘introduccion’ pa islanan ABC cu ta cuminsa dia 8 di januari na Bonaire, sigui pa Corsou dia 9 y ta caba na Aruba dia 11 di januari.

META

E meta di e bishita aki ta pa conoce e gobernantenan di e respectivo islanan, y papia cu e representantenan di comercio, NGO y esnan riba tereno social.

COMENTARIO

“Mi ta contento cu mi por cuminsa un bishita na e parti aki di Reino, mesora despues di comienzo di 2018” Knops a bisa. “Despues di a bishita Isla Riba recientemente, mi ta haya ta importante pa rapidamente conoce e islanan. Mi kier uza e biahe aki pa scucha e reto di e respectivo islanan, e ambicionnan y con nos por traha hunto den e siguiente periodo. Banda di esaki mi kier uza e bishita di trabou pa haya un bista riba e bida y trabou di e (tres) islanan”.