Editorial : Caso de Vuyst; Prohibi pa lubida

Aruba a habri un aña nobo (2018) cu e tradicion di semper, esta cende pagara, cos di bebe y come na cantidad, fiesta y tambe e parti di reflexion. Aunke no necesariamente tur hende ta celebra esaki den e orden ariba menciona. Mientras cu cada aña automaticamente ta diferente (gran parti), na esun anterior pa e motibonan obvio, mi ta spera cu e aña aki por ta sigur menos violento cu esun anterior. Y aki mi kier para keto un rato. Fuera di e racha di atraco cu dado momento a ‘bay fo’i man’ na 2017, te na un cantidad inusual di asesinato, tin mas cos cu mester frena, cu a bay malo. E unico cos ‘positivo’ den tur esunnan negativo ta cu p.e. e cantidad di e accidentenan di trafico fatal a keda reduci na un cifra bou di 5 y cu hopi caso a keda resolvi. Algo sublime…hopi bon! Aunke cu berdad cada un ta uno di mas. Pero, bek pa nos punto di awe.

E dos casonan cu a marca 2017 sigur ta esun di dia 3 di november, ora cu a haya e dama hoben Sarahi Sierra morto den su cas na De Vuyst. Un morto sumamente cruel, cu te ainda no tin solo pista di kico por a pasa, cu e dama mester a haya su morto di un forma asina cruel. Por lo menos e informacion riba e caso aki no ta conoci publicamente. Y mi sa, pasobra e famia a confirma cu nan ta den scuridad total riba esey.

Algun tempo despues, -exactamente 3 siman por cierto-, tambe riba un diabierna, ta raporta morto di un criatura di apenas 5 aña, consecuencia di violencia. Otro caso di violencia y tambe riba un diabierna. Cos no a para eynan, ya cu algun dia despues ta bin confirma cu e ruman di e criatura di 5 aña, -su ruman homber di 3 aña cu a keda raporta como perdi-, tambe tabata morto. Den e caso particular aki, e culpabel a confesa su actonan y e caso ta haya un tinte di ta un caso di asesinato practicamente soluciona. Pa e famianan ey, tin un consuelo, pasobra nan sa kico a pasa y pakico.

Awe nos ta dos luna despues, unda cu pa e famianan di e dama hoben Sarahi, no tin nada di consuelo pa nan ainda. Nada di pista, niun detencion, nada. Ainda e culpabel(nan) di e acto horendo aki ta cana liber. E mama, e dos rumannan, e yiu homber, e pareha y famia mester a pasa nan prome Pasco y Aña Nobo sin nan ser keri stima. Nan por a solamente consola otro cu lagrima y spera lo miho.

PRIORIDAD

Berdad cu e caso di e dos criaturanan a haya atencion halto, porta te hasta mas halto cu e caso di e morto di De Vuyst. Pa hopi esaki ta comprendibel, pasobra ta trata di dos criatura inocente asina chikito. E mortonan aki a impacta asina fuerte berdad, cu el a pone te hasta prioridad di e gabinete nobo Wever Croes cambia, unda cu e aña aki, en bez di pone finanzas publico como prioridad, a shift esaki pa e parti social pa percura ‘pa algo asina nunca mas sosode atrobe’. Tur ta comprendibel.

Como periodista, bo ta cubri hopi caso, violento, morto, tragedia y un cantidad mas. Pero personalmente, e caso di de Vuyst, mi a experiencia mas di cerca. Y esey a pone e perspectiva un poco mas diferente y mas ‘cerca di cas’. Ora cu durante un conferencia di prensa pa e caso di e dos criaturanan autoridad di husticia a anuncia cu e padrastro di e dos criatura a confesa su acto(nan) y responsabilisa su mes pa nan, tur hende a hala rosea cu ‘por lo menos e caso ta haya un ‘fin’. Ami tambe. Pero mientras mi tabata recoge mi aparatonan di trabou na e conferencia, mi a pensa mesora ki tristesa e famia di Sarahi mester ta sinti, cu nan caso si ainda no a haya un solucion. Nan ainda no por drumi ‘trankil’, sabiendo cu e culpabel(nan) ta tras di trali, of a haya un otro castigo. Nan ainda ta biba den temor, inseguridad, y intrankilidad. Nan ainda mester pensa, warda, spera cu pronto tin un solucion pa nan tambe. Mi a pensa mesora, cu esaki pa nan, no ta ‘fair’. Un solucion na e caso, berdad no ta trece Sarahi bek, pero por lo menos e famia ta haya sa cu esunnan cu a comete e acto aki, no por ripiti esaki nunca mas. Mi ta spera y tin tur confianza di curason, cu autoridad ta trahando duro pa e caso aki y mientras cu nos no ta tendiendo nada nada, spera cu dentro di nan seno, nan ta trahando cu alma y cuerpo pa resolve e caso. Den e caso aki, porta por uza e dicho, ‘no news is good news’ den sentido cu ta yegando na un solucion, pero pa no ‘daña’ e caso, no ta bisa nada ainda. Pero mi ta rechaza pa pensa cu autoridad ‘a lubida riba e caso aki’, of cu no por haci mucho cos cu e miedo cu e por bira un ‘cold case’. Ta prohibi pa lubida e caso horendo aki. Berdad cu ta parce cu e caso di e criaturanan a ‘lanta’ tur hende fo’i soño, pero e caso di de Vuyst, ta mes grave, sigur pa e famianan concerni e ta mas grave ainda, pasobra ta nan famia, y como tal pa nan, merece TUR atencion di autoridad. Mi ta spera di curason, cu pronto mi por raporta tambe cu e caso aki a haya un ‘solucion’. Un solucion den sentido cu e famia por haya contesta riba miles di pregunta cu nan ta haci nan mes tur dia. Pakico a mata Sarahi. Pakico a hacie asina, y kico por a bay robez. Y ken(nan) por a tribi den nan mente pa haci algo asina horendo. E mama y e dos rumannan di Sarahi merece e contestanan aki. Nan tambe merece trankilidad bek den nan bida. Mientrastanto, Sarahi lo ta e angel cu ta cuida nan di ariba y guia nan. Feliz Aña 2018 y ban traha duro pa un bon Aruba.