Editorial : Caso de Vuyst; Prohibi pa lubida

Editorial : Caso de Vuyst; Prohibi pa lubida

Posted on 01/3/2018 10:12 am AST | Updated on 01/3/2018 5:34 pm AST

Aruba a habri un aña nobo (2018) cu e tradicion di semper, esta cende pagara, cos di bebe y come na cantidad, fiesta y tambe e parti di reflexion. Aunke no necesariamente tur hende ta celebra esaki den e orden ariba menciona. Mientras cu cada aña automaticamente ta diferente (gran parti), na esun anterior pa e motibonan obvio, mi ta spera cu e aña aki por ta sigur menos violento cu esun anterior. Y aki mi kier para keto un rato. Fuera di e racha di atraco cu dado momento a ‘bay fo’i man’ na 2017, te na un cantidad inusual di asesinato, tin mas cos cu mester frena, cu a bay malo. E unico cos ‘positivo’ den tur esunnan negativo ta cu p.e. e cantidad di e accidentenan di trafico fatal a keda reduci na un cifra bou di 5 y cu hopi caso a keda resolvi. Algo sublime…hopi bon! Aunke cu berdad cada un ta uno di mas. Pero, bek pa nos punto di awe.

E dos casonan cu a marca 2017 sigur ta esun di dia 3 di november, ora cu a haya e dama hoben Sarahi Sierra morto den su cas na De Vuyst. Un morto sumamente cruel, cu te ainda no tin solo pista di kico por a pasa, cu e dama mester a haya su morto di un forma asina cruel. Por lo menos e informacion riba e caso aki no ta conoci publicamente. Y mi sa, pasobra e famia a confirma cu nan ta den scuridad total riba esey.

Algun tempo despues, -exactamente 3 siman por cierto-, tambe riba un diabierna, ta raporta morto di un criatura di apenas 5 aña, consecuencia di violencia. Otro caso di violencia y tambe riba un diabierna. Cos no a para eynan, ya cu algun dia despues ta bin confirma cu e ruman di e criatura di 5 aña, -su ruman homber di 3 aña cu a keda raporta como perdi-, tambe tabata morto. Den e caso particular aki, e culpabel a confesa su actonan y e caso ta haya un tinte di ta un caso di asesinato practicamente soluciona. Pa e famianan ey, tin un consuelo, pasobra nan sa kico a pasa y pakico.

Awe nos ta dos luna despues, unda cu pa e famianan di e dama hoben Sarahi, no tin nada di consuelo pa nan ainda. Nada di pista, niun detencion, nada. Ainda e culpabel(nan) di e acto horendo aki ta cana liber. E mama, e dos rumannan, e yiu homber, e pareha y famia mester a pasa nan prome Pasco y Aña Nobo sin nan ser keri stima. Nan por a solamente consola otro cu lagrima y spera lo miho.

PRIORIDAD

Berdad cu e caso di e dos criaturanan a haya atencion halto, porta te hasta mas halto cu e caso di e morto di De Vuyst. Pa hopi esaki ta comprendibel, pasobra ta trata di dos criatura inocente asina chikito. E mortonan aki a impacta asina fuerte berdad, cu el a pone te hasta prioridad di e gabinete nobo Wever Croes cambia, unda cu e aña aki, en bez di pone finanzas publico como prioridad, a shift esaki pa e parti social pa percura ‘pa algo asina nunca mas sosode atrobe’. Tur ta comprendibel.

Como periodista, bo ta cubri hopi caso, violento, morto, tragedia y un cantidad mas. Pero personalmente, e caso di de Vuyst, mi a experiencia mas di cerca. Y esey a pone e perspectiva un poco mas diferente y mas ‘cerca di cas’. Ora cu durante un conferencia di prensa pa e caso di e dos criaturanan autoridad di husticia a anuncia cu e padrastro di e dos criatura a confesa su acto(nan) y responsabilisa su mes pa nan, tur hende a hala rosea cu ‘por lo menos e caso ta haya un ‘fin’. Ami tambe. Pero mientras mi tabata recoge mi aparatonan di trabou na e conferencia, mi a pensa mesora ki tristesa e famia di Sarahi mester ta sinti, cu nan caso si ainda no a haya un solucion. Nan ainda no por drumi ‘trankil’, sabiendo cu e culpabel(nan) ta tras di trali, of a haya un otro castigo. Nan ainda ta biba den temor, inseguridad, y intrankilidad. Nan ainda mester pensa, warda, spera cu pronto tin un solucion pa nan tambe. Mi a pensa mesora, cu esaki pa nan, no ta ‘fair’. Un solucion na e caso, berdad no ta trece Sarahi bek, pero por lo menos e famia ta haya sa cu esunnan cu a comete e acto aki, no por ripiti esaki nunca mas. Mi ta spera y tin tur confianza di curason, cu autoridad ta trahando duro pa e caso aki y mientras cu nos no ta tendiendo nada nada, spera cu dentro di nan seno, nan ta trahando cu alma y cuerpo pa resolve e caso. Den e caso aki, porta por uza e dicho, ‘no news is good news’ den sentido cu ta yegando na un solucion, pero pa no ‘daña’ e caso, no ta bisa nada ainda. Pero mi ta rechaza pa pensa cu autoridad ‘a lubida riba e caso aki’, of cu no por haci mucho cos cu e miedo cu e por bira un ‘cold case’. Ta prohibi pa lubida e caso horendo aki. Berdad cu ta parce cu e caso di e criaturanan a ‘lanta’ tur hende fo’i soño, pero e caso di de Vuyst, ta mes grave, sigur pa e famianan concerni e ta mas grave ainda, pasobra ta nan famia, y como tal pa nan, merece TUR atencion di autoridad. Mi ta spera di curason, cu pronto mi por raporta tambe cu e caso aki a haya un ‘solucion’. Un solucion den sentido cu e famia por haya contesta riba miles di pregunta cu nan ta haci nan mes tur dia. Pakico a mata Sarahi. Pakico a hacie asina, y kico por a bay robez. Y ken(nan) por a tribi den nan mente pa haci algo asina horendo. E mama y e dos rumannan di Sarahi merece e contestanan aki. Nan tambe merece trankilidad bek den nan bida. Mientrastanto, Sarahi lo ta e angel cu ta cuida nan di ariba y guia nan. Feliz Aña 2018 y ban traha duro pa un bon Aruba. 

  • Habitantenan Parkietenbos cansa cu dump ta na candela atrobe

    Habitantenan Parkietenbos cansa cu dump ta na candela atrobe

    PARKIETENBOS - Awe merdia dump na Parkietenbos tabata na candela atrobe. NoticiaCla a compronde cu ya ta varios dia sigui cu den oranan di merdia dump di Parkietenbos tabata na candela y cu consecuencia cu e enorme cantidad di huma ta tapa Renaissance Island y tambe parti di e bario di Simeon Antonio. E biento ta fuerte den e dianan ami sinembargo de bes en cuando e ta bira y manda tur e contaminacion den e bario tambe. E portal aki a compronde cu habitantenan ta cansa y ta sperando e dia yega cu no ta kima mas sushedad riba e dump.

  • Corte a apunta directiva interino di 4 persona pa Parke Arikok

    Corte a apunta directiva interino di 4 persona pa Parke Arikok

    ORANJESTAD – Corte diahuebs merdia a apunta un directiva interino di 4 persona pa Parke Nacional Arikok cu tin como tarea pa maneha e fundacion/parke te cu luna di augustus. E personanan apunta y aproba ta ex gobernador Freddis Refunjol, secretario di Raad van Advies, Hellen van der Wal, ex director di WEB Jossy Lacle, y comerciante Norman Kuiperi. Inicialmente (manera cu NoticiaCla a informa, gobierno a postula director di impuesto Luenne Pieters, pero Corte a opta cu Pieters ta hopi ocupa aworaki y mas balioso unda cu e ta aworaki. Tur partido a bay di acuerdo cu e nombernan menciona. E intencion ta pa e grupo di persona aki keda encarga cu e maneho diario di e lugar, y no ta intencion cu nan ta bay investiga ningun hende, tuma ningun decision crucial, sino mas bien percura pa e lugar por ‘draai’ normal. Na augustus, durante un ‘zitting’, nan lo duna cuenta na huez riba kico tur a sosode, y posiblemente por tin un bon bista di kico tur mester wordo haci. A base di esey, lo por busca un persona adecuado cu ta ‘fit e profil’ basa riba loke tin y a sosode. E proceso completo lo cana via corte mes, pa esaki bay na un forma mas ordena. Gobierno a bay di acuerdo cu e candidatonan tambe.

  • Interupcion di Servicio di SMS Postpaid, Prepaid y Postpaid Hybrid

    Interupcion di Servicio di SMS Postpaid, Prepaid y Postpaid Hybrid

    ORANJESTAD - SETAR ta informa cu relaciona cu trabaonan riba su red lo tin interupcion pa mas o menos 1 ora di duracion pa e servicionan di SMS pa clientenan di Postpaid, Prepaid y PostPaid Hybrid. :

  • DOW: Lo aumenta control riba construccion illegal

    DOW: Lo aumenta control riba construccion illegal

    ORANJESTAD - Entrante 1 di juli 2018, Departamento di Obras Publico (DOW) su departamento di Maneho y Supervision lo aumenta control riba construccionan ilegal, tanto construccion di vivienda of construccion di edificio commercial. Asina nan ta bisa den un comunicado.

  • Recall productonan Kellogg’s extendi pa productonan mas bieu cu un aña

    Recall productonan Kellogg’s extendi pa productonan mas bieu cu un aña

    ORANJESTAD – E instancia federal Mericano a extende e recall di e producto di Kellogg’s pa tur producto di Kellogg’s Honey Smack Cereal. Esaki kier men, no ta importa e tamaño of e fecha di expiracion. Esaki despues di un brote di salmonella. E extension ta cubri tambe productonan cu tabata riba mercado mas hopi tempo cu aña. Pues si e producto ta existi mas cu un aña, tambe mester deshaci di dje. Departamento di salud di Aruba e siman aki a confirma cu aki a actua caba riba e recall y a check cu e distribuidor(nan) y supermercadonan pa saca e producto for di circulacion. 

  • Jossy Lacle y Luenne Pieters candidato pa dirigi Parke Arikok temporalmente

    Jossy Lacle y Luenne Pieters candidato pa dirigi Parke Arikok temporalmente

    ORANJESTAD – Den un intento pa establece orden bek na Parke Arikok, gobierno di Aruba (lesa: minister Otmar Oduber) lo propone e dos candidatonan Luenne Gomez Pieters y Jossy Laclé pa fungi como directiva interino te ora cu keda cla cu e proceso pa bin cu un directiva nobo. E intencion ta pa huez diahuebs merdia impone un ‘medida di orden’ temporal, aprobando e sugerencia di gobierno di Aruba. NoticiaCla a compronde tambe cu varios NGO a haya notificacion pa ta presente na e caso y bisa huez cu nan no tin obhecion contra e dos candidatonan. Luenne Gomez ta director di Impuesto, y Jossy Lacle ta ex director di WEB y tabata forma parti di varios hunta di comisario den pasado.

  • Powered by SETAR